Жаҳон соғлиқни сақлаш ташкилоти коронавирусга қарши самарали вакцина барчага етиб боргунига қадар дунё бўйлаб 2 миллионга яқин одам ҳалок бўлиши мумкинлигини истисно этмади. Бу ҳақда ташкилотнинг фавқулодда вазиятлар бўйича ижрочи директори Майкл Райан 25 сентябрь куни ўтказилган брифингда маълум қилди, деб хабар беради «РИА Новости».
«Буни, шубҳасиз, тасаввур қилиш қийин, бироқ бу ҳолат эҳтимолдан ҳоли эмас. Чунки биз 9 ой ичида бир миллион кишини йўқотдик ва яқин 9 ой ичида вакцинанинг пайдо бўлишига жиддий қараймиз», — дейди Райан.
Унинг сўзларига кўра, айни вақтда молиялаштириш, ишлаб чиқариш ва вакциналарни баҳолашда муаммолар бор.
Шу билан бирга, Райаннинг таъкидлашича, шифохонага ётқизилган беморлар орасида ўлим ҳолати камаймоқда. Шу сабабли одамлар ўлимига йўл қўймаслик учун дунёда ўтган тўққиз ой бўйича хулоса чиқариш имконияти мавжуд.
Аввалроқ ЖССТ дунёда COVID-19 билан касалланиш бўйича рекорд кўрсаткич қайд этилганини маълум қилганди.
Жон Ҳопкинс университети маълумотларига кўра, айни вақтда бутун дунёда коронавирус билан касалланганлар сони 32,5 миллион кишига яқинлашган. Ҳозирга қадар беморларнинг 22,3 миллиони соғайган бўлса, 987 мингдан ортиқ одам COVID-19 қурбонига айланган.
Изоҳ (0)