Qoraqalpog‘iston Respublikasi Jo‘qorg‘i Kengesida bo‘shab qolgan beshta deputatlik o‘rni uchun 20-sentabr kuni qayta saylov bo‘lib o‘tdi. Bu haqda Qoraqalpog‘iston Respublikasi Markaziy saylov komissiyasi xabar berdi.
Qoraqalpog‘iston Respublikasi Markaziy saylov komissiyasining 21-sentabrdagi qarorida qayd etilishicha, 2020-yil 20-sentabr kuni o‘tkazilgan saylov natijalari va okrug saylov komissiyalarining bayonnomalariga asoslanib, bo‘shab qolgan o‘rinlarga saylangan deputatlar Jo‘qorg‘i Kengesga qabul qilindi.
Xabarga ko‘ra, quyidagilar Jo‘qorg‘i Kengesning deputatlari etib saylangan.
- Nukus shahri bo‘yicha — 4-sonli “Yernazar Alako‘z” saylov okrugidan Ayimbetova Gulxatsha Ayimbetovna (“Adolat” sotsial demokratik partiyasi Qoraqalpog‘iston Respublikasi kengashi). 1961-yilda Taxtako‘pir tumanida tug‘ilgan;
- Ellikqal’a tumani bo‘yicha — 20-sonli “Sarabiy” saylov okrugidan Otamurodov Bayramboy Pardaboyevich (O‘zLiDeP Qoraqalpog‘iston Respublikasi kengashi). 1977-yilda Qorao‘zak tumanida tug‘ilgan;
- Beruniy tumani bo‘yicha — 25-sonli “Navbahor” saylov okrugidan Raimboyev Odilbek Ro‘zimuhammadovich (O‘zbekiston Xalq demokratik partiyasi Qoraqalpog‘iston Respublikasi kengashi). 1977-yilda Beruniy tumanida tug‘ilgan;
- Qo‘ng‘irot tumani bo‘yicha — 49-sonli “Qo‘ng‘irot” saylov okrugidan Aytjonov Paxratdin Yo‘ldoshevich (O‘zbekiston “Milliy tiklanish” demokratik partiyasi Qoraqalpog‘iston Respublikasi kengashi). 1967-yilda Xo‘jayli tumanida tug‘ilgan;
- Qorao‘zak tumani bo‘yicha — 63-sonli “Qorako‘l” saylov okrugidan Kamolov Murod Qallibekovich (O‘zbekiston Ekologik partiyasi Qoraqalpog‘iston Respublikasi kengashi). 1955-yilda Nukus shahrida tug‘ilgan.
Eslatib o‘tamiz, Qoraqalpog‘iston Jo‘qorg‘i Kengesi raisi Musa Yerniyazovda 24-iyun kuni koronavirus aniqlangan. U Respublika ixtisoslashtirilgan Xirurgiya ilmiy-amaliy tibbiyot markazining Nukus filialiga yotqizilgan. Unga COVID-19 infeksiyasi o‘ta og‘ir kechishi, ikki tomonlama pnevmoniya tashxisi qo‘yilgan. Qoraqalpog‘iston SSV axborotiga ko‘ra, Musa Yerniyazov bir oy og‘ir ahvolda bo‘lgan. 31-iyul kuni esa Musa Yerniyazov vafot etdi.
Izoh (0)