Қорақалпоғистон Республикаси Жўқорғи Кенгесида бўшаб қолган бешта депутатлик ўрни учун 20 сентябрь куни қайта сайлов бўлиб ўтди. Бу ҳақда Қорақалпоғистон Республикаси Марказий сайлов комиссияси хабар берди.
Қорақалпоғистон Республикаси Марказий сайлов комиссиясининг 21 сентябрдаги қарорида қайд этилишича, 2020 йил 20 сентябрь куни ўтказилган сайлов натижалари ва округ сайлов комиссияларининг баённомаларига асосланиб, бўшаб қолган ўринларга сайланган депутатлар Жўқорғи Кенгесга қабул қилинди.
Хабарга кўра, қуйидагилар Жўқорғи Кенгеснинг депутатлари этиб сайланган.
- Нукус шаҳри бўйича — 4-сонли «Ерназар Алакўз» сайлов округидан Айимбетова Гулхатша Айимбетовна («Адолат» социал демократик партияси Қорақалпоғистон Республикаси кенгаши). 1961 йилда Тахтакўпир туманида туғилган;
- Элликқалъа тумани бўйича — 20-сонли «Сарабий» сайлов округидан Отамуродов Байрамбой Пардабоевич (ЎзЛиДеП Қорақалпоғистон Республикаси кенгаши). 1977 йилда Қораўзак туманида туғилган;
- Беруний тумани бўйича — 25-сонли «Навбаҳор» сайлов округидан Раимбоев Одилбек Рўзимуҳаммадович (Ўзбекистон Халқ демократик партияси Қорақалпоғистон Республикаси кенгаши). 1977 йилда Беруний туманида туғилган;
- Қўнғирот тумани бўйича — 49-сонли «Қўнғирот» сайлов округидан Айтжонов Пахратдин Йўлдошевич (Ўзбекистон «Миллий тикланиш» демократик партияси Қорақалпоғистон Республикаси кенгаши). 1967 йилда Хўжайли туманида туғилган;
- Қораўзак тумани бўйича — 63-сонли «Қоракўл» сайлов округидан Камолов Мурод Қаллибекович (Ўзбекистон Экологик партияси Қорақалпоғистон Республикаси кенгаши). 1955 йилда Нукус шаҳрида туғилган.
Эслатиб ўтамиз, Қорақалпоғистон Жўқорғи Кенгеси раиси Муса Ерниязовда 24 июнь куни коронавирус аниқланган. У Республика ихтисослаштирилган Хирургия илмий-амалий тиббиёт марказининг Нукус филиалига ётқизилган. Унга COVID-19 инфекцияси ўта оғир кечиши, икки томонлама пневмония ташхиси қўйилган. Қорақалпоғистон ССВ ахборотига кўра, Муса Ерниязов бир ой оғир аҳволда бўлган. 31 июль куни эса Муса Ерниязов вафот этди.
Изоҳ (0)