“Bunday holat avval ham kuzatilgandi”
To‘tixon Kamolova, Kosonsoy tumanidagi “Hurriyat-2” MFY rais o‘rinbosari:
— Bu shov-shuvlar tumanda dastlab bizning mahalladan boshlandi. Qurbon hayitidan keyin, avgust oyining ilk kunlarida. Fuqarolarimizdan biri xonadoniga noma’lum shaxs kirgani haqida xabar berdi. Keyin buni qo‘shni ko‘chada yashovchilar ham tasdiqladi. Ichki ishlar xodimlarini chaqirib, ular bilan birga uyma-uy yurib, tomlarga chiqildi, navbatchiliklar tashkil etildi. Hozircha oxiriga yetolganimiz yo‘q, lekin 10 kundan beri tinchmiz, qayta murojaatlar bo‘lmadi.
“Hech qanday maxluq yoki mavjudot emas, qora futbolka kiygan odam edi”
Avazxon Tillayev, Kosonsoy tumanidagi “Hurriyat-2” mahallasi fuqarosi:
— Bu voqea bizga qo‘shni xonadonda yuz berdi. Egalari ko‘chib ketishgan, biz qarab turamiz. Uydagilar bizning hovlidagi ayrim narsalar qo‘shni xonadonga olib chiqib qo‘yilganini aytganidan so‘ng ular qo‘rqmasin deb qoldim. Ertasiga taxminan soat 18:00 atrofida, asr namozidan so‘ng ko‘chaga chiqdim. Shunda “qo‘shni uyda kimdir yuribdi” deb xabar berishdi, ichkariga kirganda men ham qadam tovushlarini eshitgandek bo‘ldim. Shoshib o‘rtadagi darchadan qo‘shni uyga o‘tdim. Shunda u gilos daraxtidan tomga chiqqanini ko‘rdim.
Hech qanday maxluq yoki mavjudot emas, qora futbolka kiygan, o‘rtacha jussali odam edi. Ortidan pastga to‘kilib yotgan olmalarni ham otdim. Yerga sakragandek bo‘ldi, yugurib tashqariga chiqsam, hech zog‘ yo‘q, ketib bo‘lgan ekan.
“Mahallamizda yil boshidan beri jinoyat sodir etilmagan”
Abduqodir Hamroyev, Kosonsoy tumanidagi “Obod” MFY rais o‘rinbosari:
— “Hurriyat-2” mahallasidan so‘ng bu mish-mishlar bizda tarqaldi. Hududda 5 ming nafardan ortiq aholi yashaydi. O‘z nomi bilan obod, tinch joylar, yil boshidan beri jinoyat qayd etilgani yo‘q.
“Hovlimizdagi xonalardan biriga kirilgan va g‘aladonlar ostin-ustun qilingan”
Ibrohim Usmonov, Kosonsoy tumanidagi “Obod” mahalla fuqarosi:
— Bundan ikki haftacha oldin soat 17:55 da turmush o‘rtog‘im qo‘ng‘iroq qilib, nima taom tayyorlashni, qachon kelishimni so‘radi. Gaplashib, javobimni aytib bo‘lganimdan so‘ng 20 daqiqa o‘tib, qo‘shni xotin telefon qildi va ayolim hushsiz yotganligini aytdi. Men uyga kirib kelganda tez tibbiy yordam ham yetib kelgan va shifokorlar turmush o‘rtog‘imni o‘ziga keltirishga urinayotgan ekan.
Ayolimning aytishicha, men bilan gaplashib bo‘lganidan so‘ng ikki oylik qiz chaqalog‘imiz yotgan kolyaska tomon borganida kolyaskadan 2 metr chamasi naridagi ustalar ishlatadigan yog‘och “eshak”ning ustida junli bir maxluqni ko‘rgan. U qizalog‘imga qarab, qandaydir imo-ishoralar qilgan va shundan so‘ng xotinim hushidan ketgan. Ko‘chada o‘ynab yurgan o‘g‘lim hovliga kirganidan so‘ng oyisining bu holatini ko‘rib, qo‘shni ayolni chaqirib kelgan.
Hovlimizdagi xonalardan biriga kirilgan va g‘aladonlar ostin-ustun qilingan, shkaf eshiklari ochilgan. Qiziq tomoni, g‘aladonda turgan ikkita yangi telefonga tegilmagan. Shundan keyin so‘ritok orqali tomga chiqib, qochib ketgan deb taxmin qilyapmiz.
Ichki ishlar xodimlari uyga kelib, holatni o‘rganib, surishtiruv ishlarini olib borishdi.
Shu voqeadan so‘ng darvozaga va hovlimizga kuzatuv kameralari o‘rnatdim. Ertaroq shu ishni qilganimda barchasiga allaqachon oydinlik kiritgan bo‘lar ekanmiz. Hozir turmush o‘rtog‘imning holati yaxshi, faqat o‘sha kungi hodisalarning ta’siri, asoratlari baribir bilinib turibdi...
“Jinlar haqidagi behuda gap-so‘zlar dinimizda qoralangan”
Qodirxon Azizov, Kosonsoy tumani bosh imom-xatibi:
— Insoniyat payg‘ambarimiz sunnatlari, ummatga tavsiya etilgan kundalik zikr va tasbehlardan uzoqlashsa, shunday g‘ayritabiiy narsalarga ishonuvchanlik kayfiyati kuchayadi. Tumanimizdagi bunday holatlar haqida biz ham ko‘p eshitdik. Ularning aksariyati aniq-tiniq ma’lumotlar emas, taxmin gaplar. Kishi o‘zi bilmagan va ko‘rmagan, dalil-isboti yo‘q narsalari haqida gapirishi shar’an joiz emas. Insonda qo‘rquv bo‘lsa har bir sharpadan xavotirlanishi tabiiy. “Qo‘rqqanga qo‘sha ko‘rinar” deb bejiz aytilmagan.
Jinlar haqida ko‘p gapirilyapti. Payg‘ambarimiz davrlaridan beri hech kim jinni ko‘rmagan. Shayx Muhammad Sodiq Muhammad Yusuf hazratlari ham bunday gap-so‘zlarni qoralaganlar. Turli ziyon-zahmat va xayolotlardan saqlanish uchun esa dinimizda tavsiya etilgan sura, oyat va duolarni o‘qib yurish kifoya.“Dastlabki gumonlanuvchilarimiz ham bor, hozir shu yo‘nalishda ishlayapmiz”
Shuhrat Yusufjonov, Kosonsoy tuman IIB huquqbuzarliklar profilaktikasi bo‘limi boshlig‘i:
— Aholini tashvishga solayotgan mazkur holat dastlab “Hurriyat-2” mahallasida kuzatildi va u yerga tergov-tezkor guruhi chaqirildi. Voqea joyi o‘rganildi, fuqarolardan ko‘rsatmalar olindi.
Bizga bir narsa xalaqit beryapti — murojaat bo‘layotgan joylarda haddan tashqari ko‘p odam to‘planmoqda. Bunday vaziyat iz olish yoki qandaydir ashyoviy dalillarni qo‘lga kiritishda muammo tug‘diradi.
Surishtiruvlar natijasida ayon bo‘lyaptiki, shov-shuvlarga sabab bo‘layotgan narsa g‘ayritabiiy mavjudot yoki maxluq emas. Olingan izlar bu odam ekanligini ko‘rsatmoqda. Dastlabki gumonlanuvchilarimiz ham bor, hozir shu yo‘nalishda ishlayapmiz. Tez orada buning natijalari haqida ma’lumot beramiz, degan umiddaman.
Eslatib o‘tamiz, 2019-yilda Namangan viloyatining Chust tumanidagi fermer xo‘jaligi yeridan “o‘ta shifobaxsh” suv chiqqani to‘g‘risidagi xabarlar omma o‘rtasida katta qiziqish va shov-shuvga sabab bo‘lgandi. Keyinroq viloyat Davlat sanitariya epidemiologiya markazi “shifobaxsh” suv aslida iste’molga yaroqsiz ekanligini ma’lum qilgan. O‘zga sayyoraliklar bilan uchrashganini aytib, mashhur bo‘lgan Jumanazar aka ham Namangan viloyati Uchqo‘rg‘on tumanidan edi.
Shuningdek, Namanganda g‘ayrioddiy portlash ovozlari ham tez-tez eshitilib turadi. 2018-yil 6-dekabr kuni Namanganda ilk bor qattiq gumburlash ovozi eshitilgandi. O‘shanda avvaliga Mingbuloq neft konida portlash yuz bergani ma’lum qilindi, keyinchalik bu xabar rad etildi. 14-dekabrda esa bu holat yana takrorlangandi. 2019-yil 29-mart kuni Namanganda yana bir bor kuchli gumburlash sodir bo‘lgan.
Izoh (0)