Ijtimoiy tarmoqlarda o‘zga sayyoraliklar bilan uchrashgani sabab mashhur bo‘lgan Jumanazar Rahmonov vafot etdi. Bu haqda “Daryo”ga uning o‘g‘li Uchqun Rahmonov ma’lum qildi.

Foto: YouTube

Uchqun Rahmonovning aytishicha, otasi yurak xurujidan vafot etgan. U 73 yoshni qarshilagan edi.

Jumanazar Rahmonov 2020-yil 3-avgust kuni Namangan viloyati, Uchqo‘rg‘on tumani, “Navoiy” mahallasidagi Pichanto‘pi qabristoniga dafn etildi. Undan ikki o‘g‘il va uch qiz qoldi.

Mahalla mutasaddilariga ko‘ra, Rahmonovlar oilasi dehqonchilik va chorva bilan shug‘ullanib kelgan, uylarida issiqxona tashkil etgan. Mahallaning namunali oilalaridan sanaladi.

Eslatib o‘tamiz, 2019-yil oktabr oyida o‘zga olam vakillari bilan uchrashgan otaxon paydo bo‘lgani haqidagi xabar o‘zbek internetini “portlatgandi”. O‘shanda Jumanazar aka noma’lum mavjudotlar bilan uchrashgani va ularning olamiga borib, tuzalmas dardlarga shifo topish yo‘llarini o‘rganib kelganini bildirgandi.