Mustaqillikning 29 yilligi munosabati bilan Shavkat Mirziyoyev chet el fuqarolari va xorijda yashayotgan o‘zbekistonliklarni mukofotladi

Prezident Shavkat Mirziyoyev “O‘zbekiston Respublikasi mustaqilligining yigirma to‘qqiz yilligi munosabati bilan chet el fuqarolari va xorijda istiqomat qilayotgan vatandoshlarimizni mukofotlash to‘g‘risida”gi farmonni imzoladi.

Farmonga muvofiq, bir qator xorijiy davlatlar fuqarolari va xorijda istiqomat qilayotgan o‘zbekistonliklar “Do‘stlik” va I darajali “Salomatlik” ordenlari hamda “Kelajak bunyodkori” va “Shuhrat” medallari bilan mukofotlandi.

O‘zbekiston Respublikasi va Rossiya Federatsiyasi o‘rtasidagi strategik sheriklik munosabatlarini mustahkamlash, gumanitar sohadagi ko‘p yillik samarali hamkorlikni hamda akademik va ilmiy-ta’lim almashuvlar bo‘yicha uzoq muddatli dasturlarni amalga oshirishni qo‘llab-quvvatlashdagi shaxsiy hissasi, shuningdek, xalqaro munosabatlar va iqtisodiyot sohasida yuqori malakali mutaxassislarni tayyorlashdagi bevosita ishtiroki uchun Rossiya Tashqi ishlar vazirligining Moskva davlat xalqaro munosabatlar instituti rektori Torkunov Anatoliy Vasilyevich “Do‘stlik” ordeni bilan mukofotlandi.

O‘zbekiston va Yaponiya o‘rtasidagi strategik sheriklik munosabatlari rivojiga va ko‘pqirrali hamkorlikni kengaytirishga qo‘shgan katta hissasi, O‘zbekiston Respublikasidagi iqtisodiy islohotlarni samarali amalga oshirishga qaratilgan muhim tashabbus va amaliy sa’y-harakatlari, Yaponiyaning yetakchi kompaniya va tashkilotlari ishtirokida mamlakatdagi ustuvor ijtimoiy, infratuzilma va sarmoyaviy loyihalarni, qo‘shma madaniy-gumanitar dasturlarni ro‘yobga chiqarishga ko‘rsatayotgan ulkan ko‘magi uchun Yaponiya Bosh vaziri o‘rinbosari, moliya vaziri, Yaponiya parlamentidagi O‘zbekiston bilan Do‘stlik ligasi raisi Taro Aso ham “Do‘stlik” ordeni bilan mukofotlandi.

O‘zbekiston Respublikasi bilan har tomonlama sheriklik munosabatlarini rivojlantirishga doir muhim dastur va loyihalarni ro‘yobga chiqarishdagi amaliy ko‘magi, xalqlar o‘rtasidagi o‘zaro bir-birini anglash va qo‘llab-quvvatlash tamoyillarini mustahkamlash, do‘stlik va madaniy hamkorlik aloqalarini kengaytirish ishlariga qo‘shgan munosib hissasi uchun quyidagilar “Do‘stlik” ordeniga munosib topildi.

• Ahmad Rajab Muhammad Ali Rizq — Qohira universitetining arxeologiya fakulteti professori (Misr);
• Mavlonov Shuhrat Qurvantoyevich — “Rosagrokompleks” mas’uliyati cheklangan jamiyati bosh direktori (Rossiya);
• Mark Edvard Riz — sharqshunos olim, o‘zbek adabiyoti tarjimoni (AQSh);
• Mahmudova Kamola Abdumalikovna — Yevropa tiklanish va taraqqiyot banki katta bankiri;
• Muhammadzoda Husayn Siddiq — Navoiyshunos olim va adib (Eron);
• Prakash Kejrival — “Indorama Corporation Pte. Ltd” kompaniyasi direktori (Singapur);
• Elis Uells — “Yexxon Mobil” kompaniyasining xalqaro hamkorlik bo‘yicha katta maslahatchisi (AQSh).

O‘zbekiston Respublikasida ilg‘or xorijiy tajriba, ilm-fan va texnologiyalar asosida zamonaviy sog‘liqni saqlash tizimini rivojlantirish bo‘yicha faol sa’y-harakatlari, koronavirus pandemiyasiga qarshi samarali kurashni tashkil etishda ko‘rsatgan amaliy yordami uchun quyidagilar I darajali “Salomatlik” ordeni bilan taqdirlandi.

• Lin Syuejun — Toshkent shahridagi “O‘zbek—Xitoy an’anaviy tibbiyot markazi” boshqaruvi raisi, “Beizhong Yilin Pharm Tech (Beijing) Co., Ltd” prezidenti (Xitoy);
• Filiz Erdog‘an Marashlioglu — “Kanimed Saglik Cozumleri LTD” kompaniyasi boshqaruv kengashi raisi (Turkiya);
• Soy Chje Uk — Koreya universitetining profilaktik tibbiyot kafedrasi professori, Koreya tibbiyot assotsiatsiyasi huzuridagi COVID-19 koronavirusiga qarshi choralar ko‘rish bo‘yicha Shtab maslahatchisi (Janubiy Koreya).

O‘zbekiston Respublikasining barqaror taraqqiyotini ta’minlashga qaratilgan muhim tashabbuslarni ilgari surish va ularni amalga oshirish, ustuvor iqtisodiy loyihalar va gumanitar dasturlarni qo‘llab-quvvatlash, mamlakatning xalqaro nufuzini oshirish, shuningdek, xorijiy davlatlar bilan do‘stlik va o‘zaro hamkorlikni mustahkamlashga qo‘shgan hissasi uchun quyidagilar “Kelajak bunyodkori” medali bilan mukofotlandi.

• Asadullayev Husnulla Shuhratilla o‘g‘li — O‘zbekiston yoshlari umumjahon assotsiatsiyasining Xitoydagi vakili;
• Bobojonov Bunyodbek Ulug‘bek o‘g‘li — O‘zbekiston yoshlari umumjahon assotsiatsiyasining Rossiyadagi vakili.

“Shuhrat” medali bilan

• Arislonov Saidahmad Saidahrorovich — AQShdagi “ASO Systems” kompaniyasi rahbari;
• Bediyev Kamoliddin Asomiddinovich — Berlin shahridagi Xerrman-Shuls nomidagi maktabning nemis tili fani o‘qituvchisi, O‘zbekiston yoshlari umumjahon assotsiatsiyasining Germaniyadagi vakili;
• Zufarov Sherzod Sobirovich — Fransiyaning “Société Générale” banki xususiy sektorga sarmoya kiritish fondi vitse-prezidenti;
• Ibragimov Bunyodbek Abdusharipovich — O‘zbekiston va Nagoya do‘stlik jamiyati muassisi va direktori;
• Ismoilov Bahrom Baxtiyorovich — Moskva shahridagi “Saxovat” xayriya fondi direktori (Rossiya).

Farmonga ko‘ra, O‘zbekistonning diplomatik vakolatxonalari va konsullik muassasalari rahbarlari O‘zbekiston Prezidenti nomidan davlat mukofotlarini tantanali vaziyatda topshiradi hamda ommaviy axborot vositalarida keng yoritilishini ta’minlaydi.

Eslatib o‘tamiz, Shavkat Mirziyoyev 27-avgust kuni mustaqillik bayrami munosabati bilan koronavirusga qarshi kurashayotgan tibbiyot xodimlaridan bir guruhini, shuningdek, fan, ta’lim, adabiyot, madaniyat, san’at va OAV xodimlarini mukofotlagandi. Prezidentning 28-avgustdagi farmoni bilan bir qator davlat xizmatchilari, ishlab chiqarish va ijtimoiy-iqtisodiy sohalar xodimlari mukofotlandi