Мустақилликнинг 29 йиллиги муносабати билан Шавкат Мирзиёев чет эл фуқаролари ва хорижда яшаётган ўзбекистонликларни мукофотлади

Президент Шавкат Мирзиёев «Ўзбекистон Республикаси мустақиллигининг йигирма тўққиз йиллиги муносабати билан чет эл фуқаролари ва хорижда истиқомат қилаётган ватандошларимизни мукофотлаш тўғрисида»ги фармонни имзолади.

Фармонга мувофиқ, бир қатор хорижий давлатлар фуқаролари ва хорижда истиқомат қилаётган ўзбекистонликлар «Дўстлик» ва I даражали «Саломатлик» орденлари ҳамда «Келажак бунёдкори» ва «Шуҳрат» медаллари билан мукофотланди.

Ўзбекистон Республикаси ва Россия Федерацияси ўртасидаги стратегик шериклик муносабатларини мустаҳкамлаш, гуманитар соҳадаги кўп йиллик самарали ҳамкорликни ҳамда академик ва илмий-таълим алмашувлар бўйича узоқ муддатли дастурларни амалга оширишни қўллаб-қувватлашдаги шахсий ҳиссаси, шунингдек, халқаро муносабатлар ва иқтисодиёт соҳасида юқори малакали мутахассисларни тайёрлашдаги бевосита иштироки учун Россия Ташқи ишлар вазирлигининг Москва давлат халқаро муносабатлар институти ректори Торкунов Анатолий Василевич «Дўстлик» ордени билан мукофотланди.

Ўзбекистон ва Япония ўртасидаги стратегик шериклик муносабатлари ривожига ва кўпқиррали ҳамкорликни кенгайтиришга қўшган катта ҳиссаси, Ўзбекистон Республикасидаги иқтисодий ислоҳотларни самарали амалга оширишга қаратилган муҳим ташаббус ва амалий саъй-ҳаракатлари, Япониянинг етакчи компания ва ташкилотлари иштирокида мамлакатдаги устувор ижтимоий, инфратузилма ва сармоявий лойиҳаларни, қўшма маданий-гуманитар дастурларни рўёбга чиқаришга кўрсатаётган улкан кўмаги учун Япония Бош вазири ўринбосари, молия вазири, Япония парламентидаги Ўзбекистон билан Дўстлик лигаси раиси Таро Асо ҳам «Дўстлик» ордени билан мукофотланди.

Ўзбекистон Республикаси билан ҳар томонлама шериклик муносабатларини ривожлантиришга доир муҳим дастур ва лойиҳаларни рўёбга чиқаришдаги амалий кўмаги, халқлар ўртасидаги ўзаро бир-бирини англаш ва қўллаб-қувватлаш тамойилларини мустаҳкамлаш, дўстлик ва маданий ҳамкорлик алоқаларини кенгайтириш ишларига қўшган муносиб ҳиссаси учун қуйидагилар «Дўстлик» орденига муносиб топилди.

• Аҳмад Ражаб Муҳаммад Али Ризқ — Қоҳира университетининг археология факультети профессори (Миср);
• Мавлонов Шуҳрат Қурвантоевич — «Росагрокомплекс» масъулияти чекланган жамияти бош директори (Россия);
• Марк Эдвард Риз — шарқшунос олим, ўзбек адабиёти таржимони (АҚШ);
• Маҳмудова Камола Абдумаликовна — Европа тикланиш ва тараққиёт банки катта банкири;
• Муҳаммадзода Ҳусайн Сиддиқ — Навоийшунос олим ва адиб (Эрон);
• Пракаш Кежривал — «Индорама Corporation Пте. Лтд» компанияси директори (Сингапур);
• Элис Уэллс — «Еххон Мобил» компаниясининг халқаро ҳамкорлик бўйича катта маслаҳатчиси (АҚШ).

Ўзбекистон Республикасида илғор хорижий тажриба, илм-фан ва технологиялар асосида замонавий соғлиқни сақлаш тизимини ривожлантириш бўйича фаол саъй-ҳаракатлари, коронавирус пандемиясига қарши самарали курашни ташкил этишда кўрсатган амалий ёрдами учун қуйидагилар I даражали «Саломатлик» ордени билан тақдирланди.

• Лин Сюежун — Тошкент шаҳридаги «Ўзбек—Хитой анъанавий тиббиёт маркази» бошқаруви раиси, «Beizhong Yilin Pharm Tech (Beijing) Cо., Лтд» президенти (Хитой);
• Филиз Эрдоған Марашлиоглу — «Kanimed Saglik Cozumleri LTD» компанияси бошқарув кенгаши раиси (Туркия);
• Сой Чже Ук — Корея университетининг профилактик тиббиёт кафедраси профессори, Корея тиббиёт ассоциацияси ҳузуридаги COVID-19 коронавирусига қарши чоралар кўриш бўйича Штаб маслаҳатчиси (Жанубий Корея).

Ўзбекистон Республикасининг барқарор тараққиётини таъминлашга қаратилган муҳим ташаббусларни илгари суриш ва уларни амалга ошириш, устувор иқтисодий лойиҳалар ва гуманитар дастурларни қўллаб-қувватлаш, мамлакатнинг халқаро нуфузини ошириш, шунингдек, хорижий давлатлар билан дўстлик ва ўзаро ҳамкорликни мустаҳкамлашга қўшган ҳиссаси учун қуйидагилар «Келажак бунёдкори» медали билан мукофотланди.

• Асадуллаев Ҳуснулла Шуҳратилла ўғли — Ўзбекистон ёшлари умумжаҳон ассоциациясининг Хитойдаги вакили;
• Бобожонов Бунёдбек Улуғбек ўғли — Ўзбекистон ёшлари умумжаҳон ассоциациясининг Россиядаги вакили.

«Шуҳрат» медали билан

• Арислонов Саидаҳмад Саидаҳрорович — АҚШдаги «ASO Systems» компанияси раҳбари;
• Бедиев Камолиддин Асомиддинович — Берлин шаҳридаги Херрман-Шулс номидаги мактабнинг немис тили фани ўқитувчиси, Ўзбекистон ёшлари умумжаҳон ассоциациясининг Германиядаги вакили;
• Зуфаров Шерзод Собирович — Франциянинг «Société Générale» банки хусусий секторга сармоя киритиш фонди вице-президенти;
• Ибрагимов Бунёдбек Абдушарипович — Ўзбекистон ва Нагоя дўстлик жамияти муассиси ва директори;
• Исмоилов Баҳром Бахтиёрович — Москва шаҳридаги «Саховат» хайрия фонди директори (Россия).

Фармонга кўра, Ўзбекистоннинг дипломатик ваколатхоналари ва консуллик муассасалари раҳбарлари Ўзбекистон Президенти номидан давлат мукофотларини тантанали вазиятда топширади ҳамда оммавий ахборот воситаларида кенг ёритилишини таъминлайди.

Эслатиб ўтамиз, Шавкат Мирзиёев 27 август куни мустақиллик байрами муносабати билан коронавирусга қарши курашаётган тиббиёт ходимларидан бир гуруҳини, шунингдек, фан, таълим, адабиёт, маданият, санъат ва ОАВ ходимларини мукофотлаганди. Президентнинг 28 августдаги фармони билан бир қатор давлат хизматчилари, ишлаб чиқариш ва ижтимоий-иқтисодий соҳалар ходимлари мукофотланди