O‘zbekistonda 17-avgust soat 23:30 dan 18-avgust soat 23:30 gacha koronavirus yuqtirib olish bilan bog‘liq 591 ta holat qayd etildi. Ketma-ket ikkinchi kun kasallanish holatlari 600 taga yetmayapti va oxirgi 23 kun ichidagi eng past natija qayd etildi. Yangi holatlardan so‘ng O‘zbekistonda koronavirusga chalinganlar soni 36 518 nafarga yetdi.
Yangi kasallanish holatlari
Yangi kasallangan 591 kishining barchasi tana harorati ko‘tarilgani bois profilaktika maqsadida hamda koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan:- Toshkent shahrida — 384 nafar;
- Toshkent viloyatida — 158 nafar;
- Samarqand viloyatida — 26 nafar;
- Namangan viloyatida — 9 nafar;
- Surxondaryo viloyatida — 8 nafar;
- Andijon viloyatida — 4 nafar;
- Farg‘ona viloyatida — 2 nafar.
Toshkent shahrida 384 kishida koronavirus aniqlandi. Avgust oyida Toshkentda eng kam kasallik aniqlangan kunda (2-avgust) 325 kishida, eng ko‘p kasallik aniqlangan kunda (9-avgust) 509 kishida COVID-19 qayd etildi. 1—18-avgust oralig‘ida poytaxtda (karantin zonasida aniqlangan holatlarni hisobga olmasa) 7552 ta yangi holat aniqlandi. Bu kasallanganlar soni bo‘yicha 2—3-o‘rinlarda turgan Toshkent va Samarqand viloyatlaridagi epidemiya mavsumi boshidan beri aniqlangan holatlardan ham ko‘p deganidir. Hozirda Toshkent shahrida aniqlangan umumiy kasallanish holatlari 22 175 taga yetdi.
Toshkent viloyatida 158 kishida COVID-19 aniqlandi. Viloyatda 23-iyuldan boshlab har kuni kasallikka chalinish holatlari qayd etilmoqda, 26-iyuldan beri esa har kuni koronavirusga chalinganlar soni 100 nafardan oshmoqda (ikki marta 200 tadan ham oshdi). Avgust oyining 18 kuni ichida Toshkent viloyatida koronavirusga chalinganlar soni 3059 kishiga ko‘paydi. Bu viloyatdagi jami kasallanish holatlarining 53 foiziga tengdir.
Samarqand viloyatida 26 kishida koronavirus qayd etildi. Oxirgi 9 kun ichida Samarqandda har kuni yangi bemorlar ro‘yxatga olindi, bu kunlarning yettitasida viloyat kunlik kasallanishlar soni bo‘yicha Toshkent shahri va viloyatidan so‘ng uchinchi natijani qayd etdi. Samarqand uchun avgust oyi eng ko‘p kasallanish holatlari qayd etilgan oy bo‘ldi. 18 kun ichida viloyatda 585 kishida kasallik aniqlanib, bemorlarning umumiy soni 1523 nafarga yetdi. Samarqand koronavirusga chalinganlar soni 1500 dan oshgan Toshkent shahri va Toshkent viloyatidan so‘ng 3-hudud bo‘ldi.
Namangan viloyatida 9 kishida kasallik aniqlandi. Viloyatda avgust oyida 86 kishida koronavirus aniqlandi. Bu Namangan viloyatidagi jami kasallanish holatlarining 10,3 foiziga teng deganidir.
Surxondaryo viloyatida 8 kishida COVID-19 qayd etildi. Ushbu viloyatda 1 haftadan beri yangi holatlar ro‘yxatga olinmayotgandi. 11-avgustda ham Surxondaryoda 8 kishida koronavirus aniqlangandi. Surxondaryoda koronavirusga chalinganlar orasida viloyat hokimi To‘ra Bobolov ham bor edi. Bir oy davom etgan davolanishlardan so‘ng Bobolov butkul sog‘aydi va 16-avgust kuni Toshkentdan Surxondaryoga qaytdi. Hokim darhol o‘z faoliyatiga kirishishga ulgurgan. To‘ra Bobolov koronavirusga chalingan viloyat hokimlari orasida kasallikdan tuzalgan birinchisi bo‘ldi.
Andijon viloyatida 4 kishida koronavirus aniqlandi. Viloyatda bir oy ichida (17-iyuldan beri) faqat 3 marta — 25-iyul, 8-avgust va 15-avgust kunlari yangi kasallanish holatlari aniqlanmadi. Hozir Andijonda koronavirusga chalinganlar soni 1152 nafarga yetgan. Bu vodiyning qolgan ikki viloyati — Namangan (834 ta holat) va Farg‘ona (312) viloyatlaridagi umumiy kasallanganlar sonidan (1146) ham ko‘p deganidir.
Farg‘ona viloyatida 2 kishida COVID-19 qayd etildi. Farg‘onada koronavirusga chalinganlar soni 312 nafarga yetdi. Ushbu holatlarning 58 tasi yoki 19 foizi avgustda aniqlandi.
O‘lim holatlari va ahvoli og‘ir bemorlar
SSV Toshkent shahrida 4 nafar, Toshkent viloyatida 1 nafar, jami 5 nafar koronavirusga chalingan bemor vafot etganini xabar qildi. Avgust oyida SSV 6 kunda vafot etganlar 5 nafardan bo‘lgani, 12 kunda vafot etganlar 6 nafardan bo‘lganini xabar qildi.Birinchi o‘lim. Toshkent shahri Yashnobod tumanida yashagan 60 yoshli D.P. ismli ayol vafot etgan.
Ikkinchi o‘lim. Toshkent shahri Uchtepa tumanida yashagan 52 yoshli A.E. ismli erkak vafot etgan.
Uchinchi o‘lim. Toshkent shahri Yunusobod tumanida yashagan 67 yoshli M.Yu. ismli ayol vafot etgan.
To‘rtinchi o‘lim. Toshkent viloyati Angren shahrida yashagan 61 yoshli M.G. ismli ayol vafot etgan.
Beshinchi o‘lim. Toshkent shahri Uchtepa tumanida yashagan 44 yoshli U.I. ismli erkak vafot etgan.
Hozirgacha Sog‘liqni saqlash vazirligi 243 kishining koronavirus asoratlaridan vafot etganini xabar berdi. “Daryo” hisobi bo‘yicha koronavirusga chalingach, vafot etganlar soni 252 nafarni tashkil etmoqda. Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan. Shuningdek, 19-iyul kuni Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova, 22-iyulda bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov koronavirus asoratlaridan vafot etgani xabar qilingan. 31-iyul kuni Jinoyat ishlari bo‘yicha Toshkent viloyat sudi sudyasi, 53 yoshli Xayriddin Shermuhamedov, 1-avgust kuni Toyloq tumani prokurori Farhod Abduxoliqov, Innovatsion sog‘liqni saqlash milliy palatasi “Buyuk kelajak” kengashi eksperti Sanjar Jalolov 58 yoshida vafot etgani xabar berildi. Biroq ushbu to‘qqiz holat haqida SSV tomonidan ayni vaqtgacha axborot berilmagan.
Ayni paytda tibbiyot muassasalarida davolanayotgan 4052 nafar bemordan 411 nafari og‘ir, 125 nafari esa o‘ta og‘ir ahvolda. Ahvoli og‘ir va o‘ta og‘ir bemorlarning umumiy soni 6 kundan buyon kamaymoqda: 12-avgust kuni 1785 kishining ahvoli og‘ir bo‘lgan bo‘lsa, hozirda bu ko‘rsatkich 536 nafarga tushdi. Uch hafta oldin — 29-iyulda ham ahvoli og‘ir bemorlar soni deyarli shuncha edi: 537 nafar. Ammo o‘shanda davolanayotgan bemorlar soni hozirgidan 2,3 baravar ko‘p edi: 9517 nafar. Hozirda davolanayotgan bemorlarning 13 foizining ahvoli og‘ir.
Kasallikdan davolanish
18-avgust kuni O‘zbekistonning 8 ta hududida 643 kishi koronavirusdan sog‘aydi. Oxirgi 20 kun ichida 19-marta bir kunda sog‘ayganlar soni kunlik kasallanish ko‘rsatkichidan yuqori bo‘lmoqda.Yangi tuzalganlarning
- 402 nafari Toshkent shahrida;
- 165 nafari Toshkent viloyatida;
- 34 nafari Samarqand viloyatida;
- 20 nafari Buxoro viloyatida;
- 10 nafari Surxondaryo viloyatida;
- 7 nafari Andijon viloyatida;
- 3 nafari Navoiy viloyatida;
- 2 nafari Farg‘ona viloyatida kasallikdan forig‘ bo‘ldi.
Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan, ushbu yo‘nalishda yo‘riqnoma va eslatmalar ham e’lon qilingan.
Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.
Hozirda kasallik qayd etilgan jami 36 518 nafar bemordan 32 223 nafari sog‘ayib, davolanish ko‘rsatkichi 88 foizni tashkil etmoqda. Bir kun ichida bu boradagi ko‘rsatkich o‘zgarmadi.
Ba’zi bemorlar juda tez tuzalishga muvaffaq bo‘layotganini qayd etish joiz. 12-avgustdan beri hozirgacha 4535 kishida koronavirus aniqlandi. Sog‘liqni saqlash vazirligi ma’lumotlari bo‘yicha ayni paytda 4052 nafar bemor COVID-19’dan davolanmoqda. Lekin davolanishi iyul oyidan beri davom etayotgan bemorlar ham bor. Misol tariqasida bosh vazir o‘rinbosari O‘ktam Barnoyev va Buxoro viloyati hokimi vazifasini bajaruvchi Karim Kamolovni aytish mumkin. Ularda iyul oxirlarida koronavirus aniqlangandi.
Hozirda eng ko‘p bemor Toshkent shahrida davolanmoqda — 3033 nafar. Farg‘onada 5, Jizzaxda 9, Navoiyda 14, Qashqadaryoda 18, Xorazmda 24, Surxondaryoda 25, Sirdaryoda 29, Qoraqalpog‘istonda 33, Andijonda 40, Namanganda 49, Buxoroda 54, Samarqandda 167 va Toshkent viloyatida 552 nafar bemor qoldi.
Bemorlarning juda tez tuzalishi mavzusini Toshkent viloyati misolida davom ettirsak. Oxirgi 4 kun ichida (15-avgustdan 18-avgustgacha) viloyatda 629 kishida koronavirus aniqlangan. Ammo mazkur hududda hozirda 552 kishi koronavirusdan davolanmoqda. Bu degani viloyatda 4 kun oldin kasalligi aniqlangan bemorlarning ba’zilari tuzalishga ulgurgan deganidir.
Izoh (0)