2020-yil 12—13-avgust kunlari Inson huquqlari bo‘yicha Samarqand forumi o‘tkaziladi. O‘zAning xabar berishicha, videokonferensiya shaklida bo‘lib o‘tadigan ushbu forum yoshlar huquqlarini targ‘ib qilishning dolzarb masalalariga bag‘ishlanadi.
Forum tashkilotchisi O‘zbekiston hukumati hisoblanib, anjumanni o‘tkazish mas’uliyati Inson huquqlari bo‘yicha O‘zbekiston Milliy markazi zimmasiga yuklangan.
Ushbu forum inson huquqlari sohasida xalqaro va mintaqaviy hamkorlikni mustahkamlash maqsadida tashkil etilayotgan ikkinchi xalqaro anjuman. “Inson huquqlari bo‘yicha Osiyo forumi” deb nomlangan birinchi xalqaro anjuman 2018-yil 22—23-noyabr kunlari Samarqandda bo‘lib o‘tgan. Uning ishtirokchilari tomonidan Inson huquqlari bo‘yicha Samarqand deklaratsiyasi qabul qilingan.
Osiyo forumi yakunida mazkur xalqaro anjumanning muhimligi va zarurligini hisobga olgan holda, uni har ikki yilda bir marta muntazam ravishda o‘tkazib turish haqida kelishib olingan.
Qayd etilishicha, bu galgi Samarqand forumining asosiy maqsadi yoshlar huquqlarini himoya qilish va rag‘batlantirishga taalluqli mavjud xalqaro hamda mintaqaviy mexanizmlarni tahlil qilishdan iborat. Munozaralar jarayonida ushbu mexanizmlarni takomillashtirish imkoniyatlari ham ko‘rib chiqiladi.
Kun tartibidan, shuningdek, BMT Barqaror rivojlanish maqsadlari va BMTning Inson huquqlari sohasidagi ta’lim bo‘yicha butunjahon dasturini amalga oshirishda yoshlarning roli masalasi o‘rin olgan.
Samarqand forumida BMTning Yoshlar huquqlari bo‘yicha konvensiyasi loyihasi birinchi marta jahonning yetakchi ekspertlari muhokamasi uchun taqdim qilinadi. Ushbu konvensiya loyihasiShavkat Mirziyoyevning BMT Bosh Assambleyasining 72-sessiyasidagi taklifiga muvofiq tayyorlangan.
Konvensiya tom ma’nodagi yangi hujjat bo‘lib, unda yoshlarning hozirgi zamonda dunyo miqyosida e’tirof etilishi zarur bo‘lgan o‘ziga xos huquqlari aks ettirilgan. Bunday mazmundagi xalqaro hujjatning qabul qilinishi jahondagi barcha davlatlar tomonidan yoshlar masalalariga bo‘lgan e’tiborni tubdan kuchaytiradi. Yoshlarning alohida huquqlariga jiddiy e’tibor qaratilishi, o‘z navbatida, navqiron avlod vakillariga manzilli ko‘mak ko‘rsatishda muhim omil bo‘ladi.
Yoshlar huquqlari bo‘yicha konvensiya loyihasi muhokama uchun forumning rasmiy saytida joylashtirilgan.
Samarqand forumida Birlashgan Millatlar Tashkiloti, Yevropa Ittifoqi, Islom Hamkorlik Tashkiloti, Mustaqil Davlatlar Hamdo‘stligi, Afrika Ittifoqi tizimidagi yoshlar tuzilmalari rahbarlari, diplomatik korpus vakillari, inson huquqlari bo‘yicha xalqaro, mintaqaviy va milliy institutlar, fuqarolik jamiyati institutlari, yoshlar tashkilotlari vakillari, olimlar va ekspertlar, jami 300 dan ortiq kishi ishtirok etish istagini bildirgan.
Shuningdek, tadbirda Oliy Majlisi Senati va Qonunchilik palatasi huzuridagi Yoshlar parlamenti, Yoshlar ishlari bo‘yicha agentlik, yoshlar tashkilotlari vakillarining faol ishtirok etishi kutilmoqda.
Izoh (0)