Ijtimoiy tarmoqlarda Toshkent shahar perinatal markazi xodimlarining videomurojaati tarqaldi. Unda aytilishicha, mazkur tug‘ruq majmuasi COVID-19 bilan kasallangan homilador ayollarni qabul qilish uchun moslashtirilgandan so‘ng bir guruh xodimlar uyda ishsiz qolib ketgan. Sog‘liqni saqlash vazirligi ushbu vaziyat yuzasidan munosabat bildirdi.
Qayd etilishicha, vazirlik mutaxassislari bu masalaga oydinlik kiritish maqsadida ushbu markazga borgan. Xodimlar bilan muloqot davomida ma’lum bo‘lishicha, mavjud vaziyat haqida yetarlicha tushuntirishlar berilmagani natijasida ular orasida qator savollar paydo bo‘lgan.
Aslida murojaatda aytilganidek, xodimlar ishsiz va oyliksiz qoldirilmagan. Koronavirusga chalingan homilador ayollarni davolash uchun moslashtirilgan 200 nafar bemorni qabul qilish quvvatiga ega ushbu shifoxonada hozirda 27 nafar homilador ayol koronavirusdan davolanmoqda.
Shuning uchun markaz xodimlarining bir guruhi 14 kunlik navbatchilikda bo‘lib, qolgan xodimlar esa yaxlit grafik asosida keyingi 14 kunlik navbatchilik uchun safarbar qilinadi. Ammo ayni paytda navbatchilikda bo‘lmagan xodimlarga ham belgilangan tartibda oylik maoshlari to‘lab beriladi.
Shuningdek, homilador ayollarni qabul qiluvchi shifoxonalar yetishmayotgani haqidagi fikrlarga javoban vazirlik “Toshkent shahrida 12 ta tug‘ruq muassasasi mavjud bo‘lib, ayni vaqtda shahar 3 va 7-son tug‘ruq komplekslari va Toshkent shahar perinatal markazi koronavirusga chalingan homiladorlarni qabul qilmoqda. Ushbu tug‘ruq komplekslariga biriktirilgan homilador va tug‘uvchi ayollar esa poytaxtimizdagi qolgan 9 ta tug‘ruq kompleksiga va Respublika perinatal markaziga dislokatsiya asosida taqsimlangan”, — deya tushuntirish bergan.
Murojaatchilar bilan o‘tkazilgan muloqot yakunida ularga koronavirusga chalingan homilador ayollar bilan ishlash bo‘yicha uch kunlik o‘quv mashg‘ulotlari o‘tkazishga kelishib olingan. Buning natijasida tibbiyot xodimlari keyingi 14 kunlik navbatda koronavirusga chalingan bemorlarni davolash uchun tayyorgarlik o‘taydi.
Avvalroq Toshkent viloyatidagi yuqumli kasalliklar shifoxonasiga shifokor va hamshiralar ishga taklif qilinayotgani, “O‘zekspomarkaz”dagi taqsimlash markaziga ham tibbiyot xodimlari ishga qabul qilinishi xabar berilgan edi.
Izoh (0)