“O‘zbekiston 24” telekanali “Axborot 24” dasturining 29-iyul oqshomida efirga uzatilgan sonida Toshkent shahridagi “O‘zekspomarkaz” ko‘rgazmalar majmuasida tashkil etilgan Maxsus taqsimot markazidan reportaj berildi. Unda asosiy mavzu ahvoli barqarorlashgan bemorlarning taqsimot markazini tark etishni istamayotgani, buning natijasida og‘ir ahvoldagi bemorlarga zudlik bilan yordam ko‘rsatish imkoniyati qo‘ldan chiqarilayotgani bo‘lgan.
Quyida “O‘zbekiston 24” telekanali lavhasini tomosha qilishingiz, shuningdek, uning matnli ko‘rinishi bilan tanishishingiz mumkin.
Islom Qoraboyev, “O‘zbekiston 24” telekanali boshlovchisi: O‘tgan hafta poytaxtimizda ish boshlagan “O‘zekspomarkaz”dagi taqsimot markazi ko‘pchilikning joniga oro kiryapti. Shu o‘rinda bir mulohaza, aniqrog‘i, juda ham muhim masala — bu yerda kasallik belgilari yengil yoki markazda darddan forig‘ bo‘lgan o‘nlab bemorlarni uchratish mumkin, ularga shifokorlar ko‘rsatmasi bo‘yicha uy sharoitida davolanish tavsiya qilinmoqda, zero, bo‘shagan o‘rinlarga muhtoj qancha og‘ir ahvoldagi bemorlar bor, balki o‘rtada hayot-mamot masalasi turgandir. Afsus, hamma ham buni tushunib yetmayapti. Qani o‘zbekona mehr-oqibat, insof-diyonat? Hech qanday dard insoniylik martabasidan ustun emas.
Mehroj Darxonov, “O‘zbekiston 24” telekanali muxbiri: “O‘zekspomarkaz”dagi taqsimot markazida koronavirus kasalligiga gumon qilinganlar aniq tashxis qo‘yish va zarur yordamni ko‘rsatish ishlari olib borilmoqda. Bu yerda virusga chalinganlikda gumonlangan shaxslar vaqtinch saqlanib, ularga tez yordam ko‘rsatilib, tashxis qo‘yilganidan keyin salomatligining holatiga ko‘ra, Toshkentdagi davolash-profilaktika muassasalariga yo‘naltirilmoqda. Bugungi kungacha 1000 dan ortiq bemorlarga birlamchi yordam ko‘rsatilgan, tez yordamda o‘z ishining mohir ustalari ishlamoqda.
Agar koronavirus alomatlari sezilsa, bemor muhokamalarsiz kasalxonalarga joylashtirilmoqda. Markazga tez yordam xizmati xodimlari ko‘magida olib kelingan og‘ir holatdagi bemorlarning qisqa muddatlarda sog‘lig‘i tiklanmoqda.
Bemorlardan biri: “Ahvolim og‘ir edi. Sun’iy nafas olish apparatini ulab qo‘yishgan edi. Mana, bugun oltinchi kun, o‘zim nafas olyapman, yaxshiman”.
Yana bir bemor: “Bugun, Xudo xohlasa, davolanishimning oltinchi kuni. Nafas qisishi bilan kelgandim, maza yo‘q edi, ko‘ngil aynishi, ishtahasizlik kuzatilayotgan edi. Hozir, Allohga shukr, shuncha yaxshi qarashyapti do‘xtirlarimiz”.
Mehroj Darxonov, “O‘zbekiston 24” telekanali muxbiri: Markazdagi 250 nafar tibbiyot xodimlari tunu kun bemorlar boshida turib, ularning sog‘lig‘ini nazorat qilyapti. Har kuni tez tibbiy yordam ko‘magida poytaxtimizning turli hududlaridan 200 dan ortiq koronavirusga gumonlangan fuqarolar taqsimot markaziga olib kelinmoqda. Markazda tajribali mutaxassislar bemorlarda test va tahlillar o‘tkazib, kasallik darajasi va salomatligining holatiga ko‘ra shifoxonalarga yo‘naltirmoqda. Xastalik yengil kechayotgan va uy sharoitida davolanishni ma’qul deb bilganlar esa uyda o‘zini o‘zi izolyatsiya qilgan holda davolanishga yuborilmoqda. Ammo ba’zi bemorlarga ambulator sharoitda muolajalar tavsiya qilinsa-da, ular bu yerni tark etishni istamayapti.
Abdulaziz Abdurahimov, Maxsus taqsimot markazi bosh shifokori: “Taqsimot markaziga shu kungacha 1000 dan ortiq bemor murojaat qilgan bo‘lsa, ba’zi bemorlar yetti kundan beri hali ham yotibdi. Saturatsiyasi yaxshi, qonning kislorodga to‘yinishi yaxshi, tana harorati normal. Lekin bu taqsimot markazi oxirigacha davolanadigan markaz emas. Kerak bo‘lsa, oksigenatorlarni tilxat bilan ma’lum bir vaqtga ularning o‘ziga foydalanib turish uchun berish taklifi ham chiqyapti hozir. Lekin bu bemorlar shunda ham rozi bo‘lmayapti”.
Bemor ayol va bosh shifokor suhbati
Bemor: Ertadan ketsammi, deb turgandim.Bosh shifokor: Kislorodga muhtoj ayrim bemorlar ham bor-da, vaziyatdan kelib chiqib sizga tavsiyalar bersak, sizni uyda davolanishga o‘tkazsak...
Bemor: Ertadan, Xudo xohlasa.Bosh shifokor: Bugun-chi, bugun nima bo‘ladi?
Bemor: Yo‘q, bugun ozgina mazam yo‘q.Bosh shifokor: Tana haroratingiz normal bo‘lsa, saturatsiyangiz yaxshi bo‘lsa...
Bemor erkak va bosh shifokor suhbati
Bosh shifokor: Aka, siz yaxshi bo‘lsangiz, sizga ruxsat beraylik? Boshqa bemorlar ham bor-da, kislorodga muhtoj bemorlar kelyapti.Bemor: Nafasimda ozgina qisish bor-da menda.
Bosh shifokor: Kerak bo‘lsa, oksigenatorni ham beraylik sizga? Uyda ham qo‘yib turing... Bular ham yo‘q deyaptilar-da, ko‘ryapsizmi?Bemor: Hech bo‘lmasa yana bir-ikki kun muolaja olay, keyin mayli, Xudo xohlasa...
Bemor ayol va taqsimot markazi xodimi suhbati
Xodim: Ozgina mas’uliyatni his qilaylik, xuddi siznikidek ahvolga tushgan boshqa hamyurtlarimiz bor yana. Ularni ham ozgina tushunaylik, ularga ham mana bunaqa kislorod kerak. Hozir hammasiga joylayapmiz, agar shu yerda qolaman desangiz mana bu yerga yana bitta joy qilib beramiz, lekin o‘rningizga bitta odamni joylashtiramiz.Bemor ayol: Yo‘q, ketmayman.
Mehroj Darxonov, “O‘zbekiston 24” telekanali muxbiri: Taqsimlash markazida kasallikdan tuzalib, yengil shaklni boshdan kechirayotgan o‘nlab bemorlar bor. Ularga shifokorlar ko‘rsatmasi bo‘yicha uy sharoitida davolanish tavsiya qilinmoqda. Holbuki ular og‘ir ahvoldagi bemorlar uchun hayot-mamot masalasi bo‘lib turgan davolanish o‘rinlarini bo‘shatgisi yo‘q. Bu esa markazga tushayotgan bosimni sun’iy ravishda oshirib yubormoqda. Guvohi bo‘lganingizdek bu bemorlarning ahvoli juda yaxshi, ammo ular o‘zlaridan boshqalarning g‘am-tashvishini zarracha o‘ylayotgani yo‘q. Xudbinlarcha o‘zini o‘ylayapti. Axir butun xalqimizning boshiga tushgan og‘ir kunlarda faqat o‘zini o‘ylash insofsizlik emasmi?
Rushana Aytqulova, taqsimot markazi hamshirasi: “Bemorlarimiz shu darajadaki, ‘vipiska’ bo‘ladiganlarining ham ketgisi kelmayapti. Bu yerda sharoit yaxshi, biz bu yerga shunchalik o‘rganib qoldik, deb. Buyoqda og‘ir kasallar hatto navbat kutib turibdi, lekin bu yerdagi bemorlarning ketgisi kelmayapti, sharoit shunchalik yaxshiligidan”.
Mehroj Darxonov, “O‘zbekiston 24” telekanali muxbiri: Mana shu taqsimot markazining 3-blokida 450 ga yaqin bemorlar davolanmoqda. Bugunning o‘zida mana shu 450 nafar bemorlarning 100 nafari poytaxtimizning boshqa, maxsus klinikalariga o‘tqaziladi. Taqsimot markazida har kuni bemorlarni qabul qilish, davolash va kasallikning oldini olish tizimi uzluksizligi ta’minlangan. Bu kabi ko‘rilayotgan qat’iy choralar qisqa muddatda o‘z samarasini beradi. Sabr-qanoat, insof-diyonat, eng muhimi, o‘zaro mehr-oqibatimiz, hamjihatligimiz bizni bu kunlardan omon saqlaydi.
Izoh (0)