Hozirda O‘zbekiston Sog‘liqni saqlash vazirligi huzuridagi COVID-19’ga qarshi kurashish markaziy shtabida koronavirus infeksiyasi tarqalishining oldini olish bo‘yicha maslahatchi bo‘lib ishlayotgan germaniyalik professor Verner Ber “Kun.uz”ga bergan intervyusida “Plakvenil”ni qo‘llash bo‘yicha aniq ko‘rsatma yo‘qligini ma’lum qildi.
“Taxminan ikki oy oldin, mendan infeksiya tarqalishini cheklashga yordam berish uchun bu yerga kelishimni so‘rashdi, ammo vaziyat boshqacha edi. Vaziyat o‘zgargani sababli, vazirlik yana loyihalar ishlab chiqish va O‘zbekistonda koronavirus epidemiyasini cheklashga yordam berish bo‘yicha takliflar kiritish uchun kelishimni iltimos qildi. Vaziyat umidsiz emas, ammo fuqarolar koronavirus epidemiyasiga qarshi kurashishda hamkorlik qilishlari juda muhimdir”, — deydi germaniyalik professor.
Verner Berning so‘zlariga ko‘ra, koronavirusga qarshi kurashda O‘zbekistondagi sog‘liqni saqlash tizimining ishini 1 dan 10 gacha bo‘lgan shkalada sakkiz bahoga tortadi. U hozirga qadar taqsimlash markazi va ko‘plab klinikalarga tashrif buyurgani, mamlakatning tibbiy ta’minoti unchalik yomon emasligi, yaxshilanishi kerak bo‘lgan ba’zi jihatlar mavjudligini ta’kidlagan. Xususan, professor PZR testi uch kun davom etmasligi kerakligini, hozirda zamonaviy uskunalar sizga bir necha soat ichida natijaga erishishga imkon berishini qayd etgan.
“Germaniyada biz ham ushbu muammoga duch keldik, shuning uchun sizlardagi kabi taqsimlash markazlarini tashkil qildik. Yaxshiyamki, Germaniyada bu kerak bo‘lmadi. Ammo agar biz Italiya, Ispaniya va Fransiya kabi davlatlarni olsak, ular haqiqatan ham jiddiy muammoga duch keldi, bu mamlakatlarda tibbiy xodimlari va imkoniyatlari yetishmasligi sababli hattoki ushbu davlatlar bo‘lgan bemorlar Germaniyaga ham kelishdi”, — deydi Verner Ber.
Shuningdek, germaniyalik mutaxassis “Plakvenil” dori vositasining foyda berish yoki bermasligi borasidagi fiklari bilan ham bo‘lishgan:
“Ko‘pgina institut va markazlarda ushbu kasallik bo‘yicha tadqiqotlar olib borilmoqda. Tabiiyki, hozir aytayotganim vaqt o‘tishi bilan o‘zgarishi mumkin. ‘Plakvenil’ preparatiga kelsak, dastlab uning samaradorligini ko‘rsatadigan ilmiy ish olib borildi, ammo ishonchli natijalar haqida gapirish uchun bemorlar soni kam edi. Ko‘p sonli bemorlar bilan o‘tkazilgan keyingi tadqiqotlar ‘Plakvenil’ning samaradorligini ko‘rsatmadi. Ba’zi tadqiqotlar hatto ushbu preparatning kardio zararligini ko‘rsatdi. Shu tariqa, hozirgi paytda dunyoda ushbu preparatni qo‘llash bo‘yicha aniq ko‘rsatma yo‘q. JSST preparatni koronavirusni davolash uchun tavsiya etilgan terapevtik vositalar ro‘yxatidan chiqarib tashladi”.
Verner Ber bir necha haftadan so‘ng O‘zbekiston koronavirus cho‘qqisidan o‘tilishi va kasallanish holatlari soni pasayishini, ammo bunda aholining tartib-intizomi muhim rol o‘ynashini ma’lum qilgan.
Avvalroq “Plakvenil”ni davolash protokollardan chiqarib tashlash haqida gapirgan “Tez yordam” ko‘rsatuvi ekspertiga tahdid bo‘lgani to‘g‘risida xabar berilgandi. Jahon sog‘liqni saqlash tashkiloti gidroksixloroxinning koronavirusni davolashdagi salbiy ta’sirini tasdiqlagach, bu dori O‘zbekistonda amal qilayotgan eng so‘nggi qo‘llanmadan ham chiqarib tashlandi.
Izoh (0)