O‘zbekiston adliya organlari koronavirus pandemiyasi sharoitida tibbiyot xodimlariga kunlik qo‘shimcha va rag‘batlantiruvchi to‘lovlarning to‘lanishi bo‘yicha monitoring o‘tkazdi. Monitoring natijalariga ko‘ra, bugungi kunda jami 9 milliard 9 million so‘mdan ortiq mablag‘ tibbiyot xodimlariga to‘lab berilmagani aniqlandi. Bu haqda Adliya vaziri matbuot kotibi Sevara O‘rinboyeva ma’lum qildi.
Xususan:
- Qashqadaryo viloyatida 1315 nafar xodimga 6,8 milliard so‘m (5,3 milliard so‘m to‘lab berildi);
- Samarqand viloyatida 694 nafar xodimga 838,7 million so‘m (426,5 million so‘m to‘lab berildi);
- Buxoro viloyatida 317 nafar xodimga 353,5 million so‘m;
- Sirdaryo viloyatida 741,2 million so‘m (633 mln so‘m to‘lab berildi);
- Farg‘ona viloyati adliya boshqarmasi tomonidan 211 nafar xodimga 163 million so‘m (to‘liq undirildi);
- Jizzax viloyatida 27 nafar xodimga 36 million so‘m (to‘liq undirildi);
- Toshkent viloyatida 23 million so‘m;
- Qoraqalpog‘iston Respublikasida 5 nafar xodimga 7,1 million so‘m (to‘liq undirildi) miqdorda belgilangan ustama va qo‘shimcha to‘lovlar to‘lab berilmaganlik holatlari aniqlangan.
Eslatib o‘tamiz, 2020-yilning 1-aprel kuni O‘zbekistonda koronavirusga chalinganlarni davolayotgan shifokorlarning 14 kunlik ishi uchun 25 million so‘mdan berilgani haqida xabar qilingan. Aprel o‘rtalarida Moliya vazirligi koronavirusga qarshi kurashayotgan tibbiyot xodimlariga belgilangan ustama va qo‘shimcha to‘lovlar vaqtida o‘tkazib berilayotganini ma’lum qilgan.
Izoh (0)