Sardoba suv ombori qurilishining 2-bosqichi davlat komissiyasi tomonidan qabul qilinmagan bo‘lgan. Bu haqda O‘zbekiston Bosh prokuraturasi 27-iyuldagi bayonotida ma’lum qildi.
1-may kuni Sardoba suv ombori to‘g‘oni o‘pirilgan, buning oqibatida Sirdaryo viloyatining Sardoba, Oqoltin va Mirzaobod tumanlari, shuningdek, Qozog‘istonning Turkiston viloyati Maqtaaral tumani hududlari suv ostida qolgan, minglab aholi xavfsiz hududlarga ko‘chirilgan edi.
Ma’lum qilishlaricha, hodisa yuzasidan olib borilgan tergov harakatlari davomida quyidagi asosiy taxminlar ko‘rib chiqilgan: loyihalashdagi xatoliklar, qurilish jarayonida me’yorlarga rioya qilmaslik, ekspluatatsiya jarayonidagi xatoliklar va tabiiy ofat. Yakunda tabiiy ofat taxmini chiqarib tashlangan.
“Ekspertiza suv omborini loyihalash, qurish hamda ekspluatatsiya qilish jarayonidagi qayd etilgan xato va kamchiliklar, suv ombori qurilishi 2-bosqichi davlat komissiyasi tomonidan qabul qilinmagan bo‘lsa-da, to‘la hajmda suv to‘planganligi yakka tartibda yoki ularning majmuyi to‘g‘on o‘pirilishiga sabab bo‘lganligi haqida xulosaga kelgan”, — deyiladi Bosh prokuratura axborotida.Qo‘shimcha qilinishicha, hodisa bo‘yicha qo‘zg‘atilgan jinoyat ishi doirasida to‘qqiz kishi qamoqqa olingan, qamoqqa olinganlar orasida “O‘ztemiryo‘lqurilishmontaj” UK, “Rezaksoy suv qurilish” UK, “To‘palang Sherobod” ShK, Suv xo‘jaligi vazirligi xodimlari borligi ta’kidlanmoqda. Dastlabki tergov muddati yana besh oyga uzaytirilgan.
Mavzuga doir:
Shuningdek, O‘zbekiston suv xo‘jaligi vaziri o‘rinbosari Vohidjon Ahmadjonov o‘shanda bu taxminni tasdiqlab, falokat “kuchli yomg‘ir va shamol natijasida vujudga kelgan to‘lqin loyihaviy rejadan ortiq bo‘lishi natijasida kelib chiqqan”ini, bu texnogen hodisa ekanini ta’kidlagan edi. Biroq meteorologlar 1-mayga o‘tar kechasi suv ombor hududida kuchli yog‘ingarchilik ham, kuchli shamol ham bo‘lmaganini ma’lum qilgan edi.
Izoh (0)