Нурмат Отабеков: «Биз вируснинг ташқи муҳитда ўлишига қўйиб бермаяпмиз, қўлма-қўл узатяпмиз»

Санитария-эпидемиология назорати давлат инспекцияси бош инспектори Нурмат Отабеков ҳавонинг исиши нега вирус кўпайишига тўсиқ бўла олмаётганини изоҳлади.

«Коронавирус — инсоният учун янги касаллик. У ўзининг кўп қирраларини намоён қиляпти. Шунинг учун ҳам Жаҳон соғлиқни сақлаш ташкилоти бир тўхтамга кела олмаяпти. Ташхис, даволаш, профилактика нуқтаи назаридан ҳам. Аммо биз тиббиёт ходимлари биламизки, ҳаво иссиқ ва қуруқ бўлса, вирус ўлади. Коронавирус қўзғатувчиси ҳам бу ҳаво ва шароитда ўлади. Биз касаллик вирусининг ташқи муҳитда ўлишига қўйиб бермаяпмиз. Биз уни қўлма-қўл қилиб, бир-биримизга узатяпмиз. Карантин ва чеклов тадбирларини эсдан чиқариб, ўзимиз ва оиламизни хавф остига қўйяпмиз. Асосан, касаллик вируси бино ва иншоотларда юқяпти. Бу ерда касаллик авж олиб кетишига об-ҳавони ҳам, вирусни ҳам сабабчи қилиб кўрсатиш керак эмас. Сабабни ўзимиздан қидиришимиз керак».

Шунингдек, мутахассис карантин тадбирларининг чўзилишига аҳоли томонидан карантин юмшатилишига нисбатан унинг тугагани каби муносабатда бўлганини муҳим омил сифатида келтириб ўтди.

Эслатиб ўтамиз, аввалроқ Коронавирусга қарши кураш штаби аъзоси Ҳабибулло Оқилов ҳам коронавирус 30 даража иссиқ ва ундан юқори ҳароратда юқиш фаоллигини тўлиқ йўқотиши, ҳаво намлигининг пасайиши ва тўғридан-тўғри тушувчи қуёш нурлари вирусни нобуд қилиши, ҳаво ҳарорати 70 даража ва ундан юқори бўлганда эса вирус тўлиқ йўқолишини айтган эди.