Олтин нархи 27 июль куни савдолар давомида 2011 йилда қайд этилган рекордни янгилади ва бир унсия нархи 1934 долларга чиқди. Бундан аввалги кунлик рекорд 2011 йил 6 сентябрда қайд этилган бўлиб, ўшанда олтиннинг бир унсияси 1923,7 долларга етганди, деб ёзмоқда Spot.
Wалл Street Жоурналънинг ёзишича, коронавирус дунёда олтинга бўлган талабнинг ошишига олиб келган. Қайд этилишича, олтинни нафақат трейдерлар, балки жисмоний шахслар ҳам сотиб олмоқда.
Bloomberg’нинг ёзишича, инвесторлар олтинни хавфсиз актив сифатида кўрмоқда ва пандемия фонида унга пул тикмоқда.
Олтинга бўлган талабнинг ошишига яна бир сабаб сифатида АҚШ ва Хитой ўртасидаги таранглик кўрсатилмоқда.
Олтин нархи ошишининг Ўзбекистонга таъсири
Ўзбекистон 2020 йилнинг олти ойи давомида 234,6 миллион долларлик газ экспорт қилган, бу ўтган йилнинг мос даврига нисбатан 76 фоизга камроқ. Нефть етказиб бериш 60 фоизга, рангли металлар экспорт эса 30 фоизга камайган.
Олтин экспорти Ўзбекистонинг экспорт ҳажмида 33,8 фоизни ташкил қилади. Ўтган икки йилда эса олтиннинг экспорт таркибидаги улуши 26 фоиздан ошмаган. 2020 йил бошидан буён Ўзбекистон 2,1 миллиард доллар қийматидаги олтинни экспорт қилган.
Ўзбекистон Марказий банки май ойининг бошида 2020 йил учун ўз прогнозларини эълон қилган ва унда акс этган кам сонли ижобий прогнозлардан бири айнан олтин бўлган. Марказий банк прогнозига кўра, олтин нархининг ошиши давлат бюджети даромадларига ижобий таъсир кўрсатади.
Аввалроқ олтин нархи 1,4 фоизга, яъни бир унсия учун 1803 АҚШ долларига қимматлашиб, 2011 йилдан буён энг юқори кўрсаткичга етгани хабар берилганди. Бунга коронавирус пандемиясининг иккинчи тўлқини хавфи, АҚШ ва Хитой ўртасидаги зиддиятлар, шунингдек, ривожланган давлатлар иқтисодиётига кенг кўламли маблағлар жалб қилиниши сабаб бўлганди.
Изоҳ (0)