Aprel oyi boshlarida Osiyo taraqqiyot banki 2020-yilda O‘zbekistonning gaz va mis eksporti sezilarli darajada kamayishini bashorat qilgan, ammo bu oltin eksportining o‘sishi bilan qoplanishini kutgan edi, deb yozmoqda Spot. Davlat statistika qo‘mitasi ma’lumotlariga ko‘ra, ushbu prognoz hozircha o‘zini oqlamoqda.

Qayd etilishicha, birinchi yarim yillik yakunlariga ko‘ra, O‘zbekiston 234,6 million dollarga gaz eksport qildi, bu o‘tgan yilga nisbatan 76 foizga kam. Neft yetkazib berish 60 foizga, rangli metallar yetkazib berish esa 30 foizga kamaydi.

Asosiy sabab koronavirus pandemiyasi bo‘lib, bu tashqi bozorlarga talabning pasayishiga olib keldi. Xususan, Xitoyga gaz etkazib berish uch baravar kamaydi va Rossiyaga yetkazib berish esa butunlay to‘xtadi.

Oltin eksporti, o‘z navbatida 33,8 foiz ulushi bilan birinchi o‘rinda turibdi. Taqqoslash uchun, avvalgi ikki yilda uning ulushi 26 foizdan oshmagan. O‘zbekiston yil boshidan jami 2,1 milliard dollarga oltin sotgan.

Shu yilning may oyi boshida Markaziy bank 2020-yil uchun yangilangan prognozni e’lon qilgan, u boshqa prognozlar singari pessimistik ruhda edi. Ular orasida ijobiylaridan biri aynan oltin edi.

Regulyator, narxlarning ko‘tarilishi davlat budjeti daromadlariga, bu esa o‘z navbatida ish haqi, pensiyalar va boshqa ijtimoiy xarajatlarga ijobiy ta’sir qiladi deb hisoblaydi.

Avvalroq oltin narxi 1,4 foizga, ya’ni bir unsiya uchun 1803 AQSh dollariga qimmatlashib, 2011-yildan buyon eng yuqori ko‘rsatkichga yetgani xabar berilgandi. Bunga koronavirus pandemiyasining ikkinchi to‘lqini xavfi, AQSh va Xitoy o‘rtasidagi ziddiyatlar, shuningdek, rivojlangan davlatlar iqtisodiyotiga keng ko‘lamli mablag‘lar jalb qilinishi sabab bo‘lgandi.

2019-yilning oxiridan boshlab oltin narxi 20 foizdan ko‘proqqa qimmatlashib, ko‘plab moliyaviy instrument va indekslarning o‘sish tempini ortda qoldirgan. Bozor ishtirokchilari qisqa muddatda oltin narxining yanada ko‘tarilishini kutmoqda.