Bugatti 5 million yevrolik Divo modellari testdan o‘tkazilayotganini namoyish etdi

Bugatti kompaniyasi Divo giperkarlarini dastlabki buyurtmachilarga yetkazib berishni boshlaydi. Har bir nusxa mijozga yuborilishidan oldin uzoq vaqt sinovdan o‘tkaziladi. Keng ko‘lamli test-drayv vaqtida fransiyalik muhandislar har bir avtomobilning ma’lum qilingan texnik tavsifini tasdiqlaydi, deb xabar beradi Motor.

Har bir Bugatti Divo’ni sinovlarga tayyorlash bilan olti nafar muhandis shug‘ullanadi. Test-drayvni boshlashdan oldin giperkar kuzovi himoya plyonkasi bilan qoplanadi. Shunigdek, g‘ildiraklar ham test uchun almashtiriladi. Bularning barchasi hali mijozning qo‘liga yetib bormagan mashinani maksimal darajada himoyalash uchun mo‘ljallangan.

Dinamik sinovlarni Bugatti’ning 95 foiz avtomobillarini testdan o‘tkazgan muhandis — Stiv Jenni amalga oshiradi. Mutaxassis dastlab ushbu nusxa buyurtmachining xohishiga mos kelish-kelmasligini tekshiradi, shundan so‘ng giperkarning barcha elektr funksiyalarini ko‘zdan kechirib, sinovlarga kirishadi. Test-drayv kamida besh soat davom etadi. Sinov vaqtida giperkar marshrutidan tog‘li va umumiy foydalanishga mo‘ljallangan yo‘llar o‘rin oladi. Umumiy hisobda har bir avtomobilda 300 kilometrga yaqin yo‘l bosiladi.

Giperkarning tezlik sinovlari aeroportning yopiq uchish-qo‘nish yo‘lagida amalga oshiriladi. Bu yerda Divo soatiga 250 km/soat tezlikka erishadi. Test-daryvning so‘nggi bosqichida mashina 50 kilometrli yo‘lni bosib o‘tadi va qiymati 5 million yevro turadigan giperkarga yakuniy xulosa beriladi. Dastlabki Bugatti Divo’ning 40 ta nusxasi yaqin oylar ichida o‘z egalariga yuboriladi.

Avvalroq Bugatti modellariga o‘rnatilgan konditsionerining quvvati uch xonali kvartirani sovutishga yetishi ma’lum qilingandi.