Oliy Majlis Qonunchilik palatasi deputati Rasul Kusherbayev Telegram’dagi kanalida UzAuto Motors kompaniyasining tez yordam uchun ham avtomobillarini oshirilgan narxlarda sotayotganini tanqid qildi.
Aytgancha, shu sinovli kunlarda yurtdoshlarimizga yengil bo‘lishi uchun barcha qo‘lidan kelgancha dori-darmon, tibbiy uskunalar olish uchun o‘z yonidan xayriya qilayotgan yoki beminnat xizmat ko‘rsatayotgan bir vaqtda bizning erkatoy monopolimiz “O‘zavtomotors” yuzi qizarmay, tez yordam uchun ham avtomobillarini otning kallasidek oshirilgan narxda sotishda davom etyapti.Masalan, Farg‘ona viloyati hokimligi viloyat aholisi uchun 20 ta yangi Damas’ni 75 million so‘m atrofidagi narxga sotib olib, tez yordam xizmatiga topshiribdi.
Shu “O‘zavtomotors”ga ham hayronsan. Rossiyaning Ufa shahrida avtomobillari ochiqda qolib, chirib yotsa ham o‘z xalqi uchun jilla qursa Damas’laridan bepul yoki imtiyozlar bilan berish qiyinmi?
24 yil davomida xalqimiz bilan birgamiz, deb ko‘kragini kerayotgan bu monopol hech bo‘lmasa shu og‘ir kunlarda haqiqatan xalqi bilan birga ekanligini isbotlasa bo‘lardi.
Axir shuncha yil shu xalq hisobidan yallo qilib yashadi, ertaga shu xalq bo‘lmasa uning erkaligini kim ko‘taradi, defektlar bilan chiqayotgan, otning kallasidek qimmat mashinalarini kim oladi, albatta, shu xalq oladi. Pulini to‘lab oylab kutadigan Rossiya, Qozog‘iston, Ukraina xalqi emas, shu xalq oladi, shu xalq minadi. Shu kasal bo‘layotgan odamlar bo‘lmasa, hech kimsan “monopol do‘stim”!
Rasul Kusherbayev, Oliy Majlis Qonunchilik palatasi deputati.
Mavzuga doir: Rasul Kusherbayev “Deputat, sudya va IIV xodimlari” mojarosiga munosabat bildirgan Shohrux reperni olqishladi
Shuningdek, 2020-yil 3-iyulda O‘zbekistonda Isuzu D-Max pikaplari negizida tez yordam mashinalari ishlab chiqarilishi, 7-iyulda O‘zbekiston koronavirusga chalingan bemorlar uchun yana 15 ta yangi reanimobil xarid qilingani, 20-iyulda esa Jizzaxda ishlab chiqarilgan Volkswagen Caddy negizidagi tez yordam avtomobillari Toshkentga yuborilishi haqida xabarlar berilgan.
Izoh (0)