Toshkent shahar hokimi Jahongir Ortiqxo‘jayev 18-iyul kuni o‘rinbosarlari bilan birga Toshkent tibbiyot akademiyasining shifoxonasida bo‘ldi va u yerda koronavirusdan davolanayotgan bemorlarga yaratilgan sharoitlar bilan tanishdi. Bu haqda poytaxt hokimligi matbuot xizmati xabar qilgan.
Matbuot xizmati tomonidan tadqim qilingan videoda Ortiqxo‘jayev shifoxonaning jonlantirish va boshqa bo‘limlarida davolanayotganlarga shifo tilab, ularning sog‘ayishi uchun barcha choralar ko‘rilishini aytgan.
Hokim kasalxonadagi sharoitlar, moddiy-texnik baza va dorilar ta’minoti bilan tanishgan, muassasa mutasaddilariga hokimlik doim yordamga tayyorligini bildirgan.
Jahongir Ortiqxo‘jayev 16-iyul kuni shahar 1-son klinik shifoxonasi va tez tibbiy yordam xizmati dispetcherlik markaziga borgandi.
Eslatib o‘tamiz, 15-iyulda prezident Shavkat Mirziyoyev raisligida Toshkent shahri va viloyatida koronavirusga qarshi kurashning holatiga bag‘ishlab o‘tkazilgan videoselektorda Toshkent shahri hokimi Jahongir Ortiqxo‘jayev va Sog‘liqni saqlash vaziri Alisher Shodmonovga hayfsan berilgan.
Avval Toshkent shahar hokimi Jahongir Ortiqxo‘jayevning tashabbusi bilan vaziyat juda og‘irlashganida “B rejasi” bo‘lishi uchun Toshkentning Yunusobod tumanida joylashgan “O‘zekspomarkaz” ko‘rgazma markazi maydonlarida 500 o‘rinli markaz tashkil qilinayotgani xabar qilingan.
Izoh (0)