“Sanoatqurilishbank”ning Toshkentdagi xodimi koronavirusdan vafot etgani haqida xabarlar tarqaldi. Bank marhumaning test javobi hali chiqmaganini ma’lum qildi

Ijtimoiy tarmoqlarda “Sanoatqurilishbank”ning Olmazor tumani xodimi 17-iyul kuni koronavirusdan vafot etgani, bankning yana bir necha xodimlarida kasallik tasdiqlangani haqida xabarlar paydo bo‘ldi. “Daryo” ushbu xabarlar yuzasidan bank matbuot xizmatidan ma’lumot oldi.

Ijtimoiy tarmoqlarda tarqalgan xabarlarda “Sanoatqurilishbank”ning Olmazor tumani filiali xodimi Umida Usmonova 17-iyul kuni koronavirus infeksiyasi asoratlari oqibatida vafot etgani, bankning “Al-Xorazmiy” filiali yuristida, Yunusobod tumani filiali ishlovchi va ayni vaqtda Bank-moliya akademiyasida tahsil oluvchi xodimida, Olmazor tumani filialining xavfsizlik bo‘yicha mas’ulida koronavirus infeksiyasi tasdiqlangani aytiladi.

Bank matbuot xizmati rahbari Behzod Bozorovning “Daryo”ga ma’lum qilishicha, mehnat ta’tilida bo‘lgan Umida Usmonova ikki tomonlama pnevmoniya oqibatida hayotdan ko‘z yumgan. Marhuma koronavirusga test topshirgan bo‘lgan, biroq testning javobi hali ham chiqmagan. “Umida Usmonovaning bevaqt vafoti nafaqat filial xodimlari, balki butun bank jamoasi uchun kutilmagan yo‘qotish bo‘ldi”, — dedi “Sanoatqurilishbank” matbuot kotibi.

Shuningdek, biri o‘qishda, ikkinchisi esa mehnat ta’tilida bo‘lgan yana ikki nafar xodimda koronavirus infeksiyasi tasdiqlangan. “Ularning har ikkisi shifoxonaga yotgan va hozirgi kunda sog‘ayib chiqqan. Bitta holatda noto‘g‘ri ma’lumot tarqatilgan, ushbu xodim test natijalari manfiy chiqqan”, — deya aniqlik kiritdi Behzod Bozorov.

Bank matbuot xizmatidan ma’lum qilishlaricha, hozirgi kunda “bankning barcha filiallarida xodimlar koronavirusga testdan o‘tkazib kelinmoqda”. Qayd etish joiz, avvalroq bankning Navoiy viloyati filiali boshqaruvchisi o‘ribosari Xurshid Shabonov koronavirus infeksiyasi asoratlari oqibatida vafot etgani haqida xabar berilgan edi.