Sog‘liqni saqlash vazirligi, AOKA, Yoshlar ittifoqi hamda Milliy mass-mediani qo‘llab-quvvatlash va rivojlantirish jamoat fondi tomonidan ta’sis qilingan “KoronavirusInfo” Telegram kanali O‘zbekistonda karantinning 31-avgustgacha uzaytirilganini inkor qildi.
“Ijtimoiy tarmoqlar va Telegram kanallarida tarqatilgan O‘zbekistonda karantin tartibi 31-avgustga qadar uzaytirilishi haqidagi xabarlar yolg‘on va haqiqatga to‘g‘ri kelmaydi.
Eslatib o‘tamiz, aholi o‘rtasida yolg‘on axborot tarqatganlik uchun javobgarlik mavjud”, – deyiladi kanaldagi xabarda.
11-iyulda Respublika maxsus komissiyasining qarori bilan aholi o‘rtasida koronavirus infeksiyasining tarqalish zanjirini uzish maqsadida O‘zbekistonda navbatdagi karantin cheklovlari joriy etilgan.
Undan avval 8-iyulda O‘zbekistonda koronavirus bilan bog‘liq vaziyatning keskinlashayotgani sababli 10-iyuldan 1-avgustgacha qat’iy karantin choralari joriy qilingan. 10-iyuldan to‘ylar, oilaviy va ommaviy tadbirlar taqiqlangan, avtotransport harakati cheklangan, buyum bozorlari va bolalar bog‘chalari yopilgan, koronavirusdan uy sharoitida davolanayotganlarga tibbiy yordam berish uchun mobil guruhlar tashkil etilgan, O‘zbekistonning barcha hududlari epidemiologik toifasi “qizil” deb belgilangan.
Shuningdek, 11-iyuldagi qarorga ko‘ra, 2020-yil 18—19-iyul hamda 25—26-iyul (shanba va yakshanba) kunlari butun sutka davomida respublika miqyosida harakatlanish, avtotransport vositalarining, shu jumladan, yo‘nalishsiz taksilarning harakati to‘liq to‘xtatilgan.
18—19-iyul hamda 25—26-iyul (shanba va yakshanba) kunlari aholiga o‘zini o‘zi yakkalash hayot tarziga qat’iy rioya etgan holda o‘z uylarida qolish, davlat organlari va muassasalari, xo‘jalik birlashmalari hamda boshqa tashkilotlarga — xodimlarni ishga jalb etmaslik, xodimlarning ushbu kunlarda uyda qolishi uchun sharoit yaratish tavsiya etilgandi.
Izoh (0)