Тошкент шаҳар ҳокими Жаҳонгир Ортиқхўжаев 18 июль куни ўринбосарлари билан бирга Тошкент тиббиёт академиясининг шифохонасида бўлди ва у ерда коронавирусдан даволанаётган беморларга яратилган шароитлар билан танишди. Бу ҳақда пойтахт ҳокимлиги матбуот хизмати хабар қилган.
Матбуот хизмати томонидан тадқим қилинган видеода Ортиқхўжаев шифохонанинг жонлантириш ва бошқа бўлимларида даволанаётганларга шифо тилаб, уларнинг соғайиши учун барча чоралар кўрилишини айтган.
Ҳоким касалхонадаги шароитлар, моддий-техник база ва дорилар таъминоти билан танишган, муассаса мутасаддиларига ҳокимлик доим ёрдамга тайёрлигини билдирган.
Жаҳонгир Ортиқхўжаев 16 июль куни шаҳар 1-сон клиник шифохонаси ва тез тиббий ёрдам хизмати диспетчерлик марказига борганди.
Эслатиб ўтамиз, 15 июлда президент Шавкат Мирзиёев раислигида Тошкент шаҳри ва вилоятида коронавирусга қарши курашнинг ҳолатига бағишлаб ўтказилган видеоселекторда Тошкент шаҳри ҳокими Жаҳонгир Ортиқхўжаев ва Соғлиқни сақлаш вазири Алишер Шодмоновга ҳайфсан берилган.
Аввал Тошкент шаҳар ҳокими Жаҳонгир Ортиқхўжаевнинг ташаббуси билан вазият жуда оғирлашганида «Б режаси» бўлиши учун Тошкентнинг Юнусобод туманида жойлашган «Ўзэкспомарказ» кўргазма маркази майдонларида 500 ўринли марказ ташкил қилинаётгани хабар қилинган.
Изоҳ (0)