O‘zbekiston oliy va o‘rta maxsus ta’lim vaziri Inomjon Majidov 9-iyul, payshanba kuni o‘tkazilgan brifingda karantin sababli oliy ta’lim muassasalarida kontrakt pulini to‘lash tizimiga o‘zgartirish kiritilishi yoki bu masalada imtiyozlar belgilanishi masalasidagi savollarga javob berdi.
Vazirning ma’lum qilishicha, kontrakt miqdori bo‘yicha hech qanday o‘zgarish kiritilmadi. Kontrakt puli eng kam oylik ish haqi miqdoriga bog‘langan. Agar shu bog‘lanish koeffitsiyenti o‘zgarsagina, kontrakt summasi o‘zgarishi mumkin.
Inomjon Majidovning ta’kidlashicha, hozirgi kontraktning bazaviy miqdori shartli ravishda qo‘yilgan miqdor. “U hamma xarajatlarni qoplaydigan miqdor emas. Bu miqdorning o‘zi imtiyozli”, — dedi vazir.
Qayd etilishicha, 2020-yildan 10 ta OTM o‘zini o‘zi moliyalash tizimiga o‘tayotgani sababli bu OTMlar xarajatlarini qoplash uchun o‘zlari kontrakt miqdorini belgilashi kerak edi. Lekin karantin sharoitidan kelib chiqib, ular shartnoma pulini o‘zgartirmaslika qaror qildi. “Bu ham imtiyozlardan biri hisoblanadi”, — deya qo‘shimcha qildi Inomjon Majidov.
Avvalroq O‘zbekistonda o‘zini o‘zi moliyalashtirishga o‘tgan OTMlar to‘lov-kontrakt miqdorini e’lon qilgandi. Oliy va o‘rta maxsus ta’lim vazirligi pandemiya sharoitidan kelib chiqib, aholining ijtimoiy himoyasini ta’minlash, talaba-yoshlarning tahsil olishi uchun qulay sharoitlarni yaxshilash maqsadida 2020/2021-o‘quv yili uchun to‘lov-kontrakt miqdorini oshirmaslikka qaror qilinganini ma’lum qilgandi.
Mavzuga doir:
- O‘zbekistonda o‘zini o‘zi moliyalashtirish tizimiga o‘tgan OTMlarga kontrakt miqdorini mustaqil belgilash huquqi berildi
- O‘zbekiston OTMlariga kirish uchun 2020-yilda 7 toifadagi 8694 nafar abituriyentga imtiyozli davlat granti ajratiladi
- O‘zbekistonda keyingi o‘quv yilidan faqat davlat granti kvotalari belgilanadi. To‘lov-kontrakt bo‘yicha qabul kvotasini OTMlar mustaqil belgilaydi
Izoh (0)