Ўзбекистон олий ва ўрта махсус таълим вазири Иномжон Мажидов 9 июль, пайшанба куни ўтказилган брифингда карантин сабабли олий таълим муассасаларида контракт пулини тўлаш тизимига ўзгартириш киритилиши ёки бу масалада имтиёзлар белгиланиши масаласидаги саволларга жавоб берди.

Вазирнинг маълум қилишича, контракт миқдори бўйича ҳеч қандай ўзгариш киритилмади. Контракт пули энг кам ойлик иш ҳақи миқдорига боғланган. Агар шу боғланиш коэффициенти ўзгарсагина, контракт суммаси ўзгариши мумкин.

Иномжон Мажидовнинг таъкидлашича, ҳозирги контрактнинг базавий миқдори шартли равишда қўйилган миқдор. «У ҳамма харажатларни қоплайдиган миқдор эмас. Бу миқдорнинг ўзи имтиёзли», — деди вазир.

Қайд этилишича, 2020 йилдан 10 та ОТМ ўзини ўзи молиялаш тизимига ўтаётгани сабабли бу ОТМлар харажатларини қоплаш учун ўзлари контракт миқдорини белгилаши керак эди. Лекин карантин шароитидан келиб чиқиб, улар шартнома пулини ўзгартирмаслика қарор қилди. «Бу ҳам имтиёзлардан бири ҳисобланади», — дея қўшимча қилди Иномжон Мажидов.

Аввалроқ Ўзбекистонда ўзини ўзи молиялаштиришга ўтган ОТМлар тўлов-контракт миқдорини эълон қилганди. Олий ва ўрта махсус таълим вазирлиги пандемия шароитидан келиб чиқиб, аҳолининг ижтимоий ҳимоясини таъминлаш, талаба-ёшларнинг таҳсил олиши учун қулай шароитларни яхшилаш мақсадида 2020/2021-ўқув йили учун тўлов-контракт миқдорини оширмасликка қарор қилинганини маълум қилганди.