Sardoba suv ombori yorilishi oqibatida yuzaga kelgan suv toshqinidan zarar ko‘rgan Mirzaobod tumani “Haqiqat” mahallasida uylar qayta ta’mirlanib, o‘z egalariga topshirildi. Bu haqda Mirzaobod tumani hokimligi xabar berdi.
Ma’lum qilinishicha, tezkor tozalash va tiklash ishlarida Milliy gvardiya, Mudofaa vazirligi hamda Favqulodda vaziyatlar vazirligining harbiylari yordam bergan.
Mavzuga doir: Sardoba falokatidan zarar ko‘rgan 1828 ta uy ta’mirlandi, 32 ta ko‘prik qayta tiklandi
Hokimlikning ta’kidlashicha, respublikaning barcha viloyatlaridan ko‘makka kelgan qurilish tashkilotlarining qurilish-ta’mirlash ishlarini tezkor olib borayotganligi natijasida barcha talafot ko‘rgan hududlar yangidan qad rostlamoqda.
Mirzaobod tumanidagi “Haqiqat” mahallasida Sirdaryo viloyati qurilish boshqarmasiga qarashli pudrat tashkilotlari tomonidan qurib bitkazilgan o‘nta xonadonni topshirish marosimi bo‘ldi.
Qayd etilishicha, tadbirda quruvchilar, muhandislar, barcha mutasaddilar va sektor rahbarlari ishtirok etdi. Viloyat hokimining birinchi o‘rinbosari Anvar Karimov quruvchilarga minnatdorlik bildirib, xonadon egalarini yangidan barpo etilgan barcha qulayliklarga ega bo‘lgan xonadonlariga ko‘chib kirishlari bilan tabrikladi.
Mavzuga doir: Keng muhokamalarga sabab bo‘lgan Sardobadagi 28 ta uyning taqdiri qanday kechayotgani haqida ma’lumot berildi
Eslatib o‘tamiz, 1-may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgandi. Favqulodda vaziyat sababli Sardoba, Oqoltin, Mirzaobod tumanlaridagi 24 ta mahalladan 90 mingga yaqin fuqaro zudlik bilan xavfsiz hududga evakuatsiya qilingan. Suv toshqini oqibatida 4435 ta xonadon talafot ko‘rgan. Ulardan 2390 tasi yaroqsiz holga kelgan, 2045 tasi esa ta’mirtalab holatda. Sardoba tumani “Do‘stlik” mahallasida 37 ta 1480 xonadonli; Mirzaobod tumani “Haqiqat” mahallasida 20 ta 800 xonadonli va “Navbahor” mahallasida 9 ta 360 xonadonli ko‘p qavatli turar joy qurilish ishlari boshlangan.
15-may kuni Prezident Shavkat Mirziyoyev sardobaliklar bilan uchrashuvda suv toshqini oqibatida zarar ko‘rgan uylar davlat tomonidan bepul ta’mirlab berilishini, uylari zararlangan odamlarning ilgarigi hovlilari ham o‘zlarida qolishini ma’lum qilgan edi. Bundan tashqari, shu kuni suv toshqinidan jabr ko‘rgan 4,5 mingdan ortiq xonadon egalariga 40 million so‘mlik moddiy yordam sertifikati, maishiy texnika to‘plami uchun sertifikat va ichida pul mablag‘i bo‘lgan bank kartochkalari tarqatilishi ma’lum qilindi.
Bosh prokuratura Sardoba falokati yuzasidan jinoyat ishi bo‘yicha 4 ta tergov versiyasini ko‘rib chiqmoqda. Hozirda suv ombori ishi bo‘yicha ikki kishi qamoqqa olingan.
Izoh (0)