O‘zbekistonda 25-iyun kuni koronavirus qayd etilgan 276 nafar bemordan 24 nafari aholi orasida tasdiqlanib, shundan 17 holatda kasallik Toshkent shahrida aholi orasida aniqlandi. Sog‘liqni saqlash vazirligi poytaxtda qayd etilgan mazkur holatlar haqida ma’lumot berdi.
Eslatib o‘tamiz, 24-iyun kuni Toshkent shahrining beshta tumanida aholi orasida 18 kishida koronavirus aniqlangandi. 25-iyun kuni bir kun avvalgiga nisbatan bitta kam holat aniqlandi.
Jumladan, Toshkent shahridagi Sergeli tumani hokimligi xodimi A.T. profilaktik maqsadda namuna topshirganda, unda koronavirus tasdiqlangan. “O‘zbekneftgaz” AJ xodimi A.Q. ham profilaktik tekshiruv davomida koronavirusga chalingani aniqlangan. Respublika shoshilinch tibbiy yordam ilmiy markazi sanaviatsiya xodimi S.U. koronavirusga gumon qilingan bemorlarga tibbiy xizmat ko‘rsatgan va unda infeksiya qayd etilgan.
Shuningdek, Uchtepa tumanida yashovchi 2 nafar fuqaro tana harorati yuqoriligi sababli shifoxonaga murojaat qilgan va ularda koronavirus borligi ma’lum bo‘lgan. Shayxontohur tumanida yashovchi S.Z. hamda Olmazor tumanida yashovchi R.A. tana harorati ko‘tarilganligi sababli poliklinikaga murojaat qilgan va olingan tahlil ularda virus borligini ko‘rsatgan. Chilonzor tumanida yashovchi santexnik U.I.da ham koronavirus infeksiyasi aniqlangan.
“Sog‘liqni saqlash vazirligi aholi orasida koronavirusga chalinish holatlari ko‘payganligi sababli poytaxtimiz aholisi va mehmonlarini karantin va sanitariya qoidalariga qat’iy amal qilishlarini so‘rab qoladi”, — deyiladi vazirlik xabarida.
Izoh (0)