Сардоба сув омбори ёрилиши оқибатида юзага келган сув тошқинидан зарар кўрган Мирзаобод тумани «Ҳақиқат» маҳалласида уйлар қайта таъмирланиб, ўз эгаларига топширилди. Бу ҳақда Мирзаобод тумани ҳокимлиги хабар берди.
Маълум қилинишича, тезкор тозалаш ва тиклаш ишларида Миллий гвардия, Мудофаа вазирлиги ҳамда Фавқулодда вазиятлар вазирлигининг ҳарбийлари ёрдам берган.
Ҳокимликнинг таъкидлашича, республиканинг барча вилоятларидан кўмакка келган қурилиш ташкилотларининг қурилиш-таъмирлаш ишларини тезкор олиб бораётганлиги натижасида барча талафот кўрган ҳудудлар янгидан қад ростламоқда.
Мирзаобод туманидаги «Ҳақиқат» маҳалласида Сирдарё вилояти қурилиш бошқармасига қарашли пудрат ташкилотлари томонидан қуриб битказилган ўнта хонадонни топшириш маросими бўлди.
Қайд этилишича, тадбирда қурувчилар, муҳандислар, барча мутасаддилар ва сектор раҳбарлари иштирок этди. Вилоят ҳокимининг биринчи ўринбосари Анвар Каримов қурувчиларга миннатдорлик билдириб, хонадон эгаларини янгидан барпо этилган барча қулайликларга эга бўлган хонадонларига кўчиб киришлари билан табриклади.
Мавзуга доир: Кенг муҳокамаларга сабаб бўлган Сардобадаги 28 та уйнинг тақдири қандай кечаётгани ҳақида маълумот берилди
Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Фавқулодда вазият сабабли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.
15 май куни Президент Шавкат Мирзиёев сардобаликлар билан учрашувда сув тошқини оқибатида зарар кўрган уйлар давлат томонидан бепул таъмирлаб берилишини, уйлари зарарланган одамларнинг илгариги ҳовлилари ҳам ўзларида қолишини маълум қилган эди. Бундан ташқари, шу куни сув тошқинидан жабр кўрган 4,5 мингдан ортиқ хонадон эгаларига 40 миллион сўмлик моддий ёрдам сертификати, маиший техника тўплами учун сертификат ва ичида пул маблағи бўлган банк карточкалари тарқатилиши маълум қилинди.
Бош прокуратура Сардоба фалокати юзасидан жиноят иши бўйича 4 та тергов версиясини кўриб чиқмоқда. Ҳозирда сув омбори иши бўйича икки киши қамоққа олинган.
Изоҳ (0)