O‘zbekistonda 21-iyun kuni koronavirus qayd etilgan 162 nafar bemordan 22 nafari aholi orasida tasdiqlandi. 20-iyun sanasida mamlakatda koronavirus infeksiyasi tasdiqlangan 207 nafar bemordan 19 nafari aholi orasida aniqlangandi. Ikki kunlik ma’lumotga ko‘ra, umumiy kasallanish ko‘rsatkichi kamaygan bo‘lsa-da, ammo aholi orasida koronavirusga chalinish holati oshgan, deb xabar bermoqda Sog‘liqni saqlash vazirligi.
Ma’lum qilinishicha, 21-iyun kuni aholi orasida aniqlangan koronavirus bemorlari soni Buxoro viloyatida 11 nafar, Toshkent shahrida 7 nafar, Sirdaryo, Samarqand, Andijon va Toshkent viloyatlarida 1 nafardan bo‘lgan.
Toshkent shahar Shayxontohur tumanida yashovchi G.I. sanatoriyga yotish maqsadida namuna topshirganda va fuqaro Z.G. esa shifoxonaga yotish uchun namuna topshirganda ularda koronavirus infeksiyasi borligi aniqlangan. Shuningdek, “Ipoteka bank”ning Chilonzor tuman filiali xodimi F.A. tana harorati ko‘tarilganligi sababli namuna topshirgan va unda koronavirus borligi ma’lum bo‘lgan. Uzbekistan Airways xodimi Sh.D. ishga qaytish uchun namuna topshirganda unga virus yuqqani aniqlangan. Toshkent shahridagi “AMG” MChJ xodimi K.M. profilaktika maqsadida namuna topshirganda unda kasallik qayd etilgan.
Buxoro viloyatidagi xorijiy korxonaning 4 nafar ishchisida koronavirus aniqlangan. Ma’lum qilinishicha, korxona xodimlaridan birining tana harorati ko‘tarilgan va namuna topshirgan. Profilaktika maqsadida boshqa xodimlardan ham namuna olingan va 4 nafar xodim kasallangani aniqlangan. Shu hududdagi issiqxonaning 5 nafar ishchisi profilaktika maqsadida namuna topshirgandan so‘ng ularda kasallik tasdiqlangan. Shuningdek, viloyatda profilaktika maqsadida namuna olingan yana 2 nafar fuqaroda ham kasallik aniqlangan.
Andijon viloyati Paxtaobod tumanida yashovchi X.T.da ham koronavirus qayd etilgan. U Toshkent shahar Yakkasaroy tumanidagi “F-market” do‘konida sotuvchi bo‘lib ishlagan. Uning tana harorati ko‘tarilgach, Andijon viloyatiga, o‘z uyiga qaytgan.
Sirdaryo viloyati Guliston shahrida yashovchi fuqaro G.A.da hamda Samarqand shahar sanitariya-epidemiologiya osoyishtaligi markazi xodimida ham koronavirus infeksiyasi tasdiqlangan. Ayni paytda ushbu holatlar yuzasidan epidemiologik surishtiruv ishlari olib borilmoqda.
“Vaziyat hamon xavotirli ekanini inobatga olib, Sog‘liqni saqlash vazirligi aholidan yon-atrofdagi odamlar bilan ijtimoiy masofa saqlagan holda, imkon qadar kamroq muloqotda bo‘lishni va zarurat bo‘lmaganda ko‘chaga chiqmaslik, ozodalikni saqlash, qo‘llarni yaxshilab, qayta-qayta yuvish, ko‘chaga chiqqanda niqobni to‘g‘ri taqib yurish kabi karantin qoidalariga muntazam ravishda qat’iy rioya etishni so‘rab qoladi”, — deyiladi vazirlik xabarida.
Eslatib o‘tamiz, O‘zbekistonda 22-iyun soat 10:00 holatiga ko‘ra koronavirusga chalinganlar soni 43 kishiga ko‘payib, 6358 nafarga yetdi. O‘zbekistonda hozirgacha koronavirusga chalingan shaxslarning 4384 nafari sog‘aygan, 19 nafari esa kasallik asoratlari oqibatida vafot etgan.
Izoh (0)