Ўзбекистонда 21 июнь куни коронавирус қайд этилган 162 нафар бемордан 22 нафари аҳоли орасида тасдиқланди. 20 июнь санасида мамлакатда коронавирус инфекцияси тасдиқланган 207 нафар бемордан 19 нафари аҳоли орасида аниқланганди. Икки кунлик маълумотга кўра, умумий касалланиш кўрсаткичи камайган бўлса-да, аммо аҳоли орасида коронавирусга чалиниш ҳолати ошган, деб хабар бермоқда Соғлиқни сақлаш вазирлиги.
Маълум қилинишича, 21 июнь куни аҳоли орасида аниқланган коронавирус беморлари сони Бухоро вилоятида 11 нафар, Тошкент шаҳрида 7 нафар, Сирдарё, Самарқанд, Андижон ва Тошкент вилоятларида 1 нафардан бўлган.
Тошкент шаҳар Шайхонтоҳур туманида яшовчи Г.И. санаторийга ётиш мақсадида намуна топширганда ва фуқаро З.Г. эса шифохонага ётиш учун намуна топширганда уларда коронавирус инфекцияси борлиги аниқланган. Шунингдек, «Ипотека банк»нинг Чилонзор туман филиали ходими Ф.А. тана ҳарорати кўтарилганлиги сабабли намуна топширган ва унда коронавирус борлиги маълум бўлган. Uzbekistan Airways ходими Ш.Д. ишга қайтиш учун намуна топширганда унга вирус юққани аниқланган. Тошкент шаҳридаги «AMG» МЧЖ ходими К.М. профилактика мақсадида намуна топширганда унда касаллик қайд этилган.
Бухоро вилоятидаги хорижий корхонанинг 4 нафар ишчисида коронавирус аниқланган. Маълум қилинишича, корхона ходимларидан бирининг тана ҳарорати кўтарилган ва намуна топширган. Профилактика мақсадида бошқа ходимлардан ҳам намуна олинган ва 4 нафар ходим касаллангани аниқланган. Шу ҳудуддаги иссиқхонанинг 5 нафар ишчиси профилактика мақсадида намуна топширгандан сўнг уларда касаллик тасдиқланган. Шунингдек, вилоятда профилактика мақсадида намуна олинган яна 2 нафар фуқарода ҳам касаллик аниқланган.
Андижон вилояти Пахтаобод туманида яшовчи Х.Т.да ҳам коронавирус қайд этилган. У Тошкент шаҳар Яккасарой туманидаги «F-market» дўконида сотувчи бўлиб ишлаган. Унинг тана ҳарорати кўтарилгач, Андижон вилоятига, ўз уйига қайтган.
Сирдарё вилояти Гулистон шаҳрида яшовчи фуқаро Г.А.да ҳамда Самарқанд шаҳар санитария-эпидемиология осойишталиги маркази ходимида ҳам коронавирус инфекцияси тасдиқланган. Айни пайтда ушбу ҳолатлар юзасидан эпидемиологик суриштирув ишлари олиб борилмоқда.
«Вазият ҳамон хавотирли эканини инобатга олиб, Соғлиқни сақлаш вазирлиги аҳолидан ён-атрофдаги одамлар билан ижтимоий масофа сақлаган ҳолда, имкон қадар камроқ мулоқотда бўлишни ва зарурат бўлмаганда кўчага чиқмаслик, озодаликни сақлаш, қўлларни яхшилаб, қайта-қайта ювиш, кўчага чиққанда ниқобни тўғри тақиб юриш каби карантин қоидаларига мунтазам равишда қатъий риоя этишни сўраб қолади», — дейилади вазирлик хабарида.
Эслатиб ўтамиз, Ўзбекистонда 22 июнь соат 10:00 ҳолатига кўра коронавирусга чалинганлар сони 43 кишига кўпайиб, 6358 нафарга етди. Ўзбекистонда ҳозиргача коронавирусга чалинган шахсларнинг 4384 нафари соғайган, 19 нафари эса касаллик асоратлари оқибатида вафот этган.
Изоҳ (0)