Xalqaro kompaniyalar guruhi Humans O‘zbekiston bozoriga kirmoqda. Bu haqda kompaniya matbuot xizmatiga tayanib, Spot xabar berdi.
Ma’lum qilinishicha, 16-iyun kuni Humans O‘zbekistonda o‘z mobil dasturining birinchi talqinini taqdim etdi. Dastur o‘zida moliyaviy xizmatlar, mobil aloqa operatori hamda tovarlar va xizmatlar peshtaxtasini birlashtirgan.
“Endi O‘zbekiston aholisi butun mamlakat bo‘ylab Humans’ning hamkorlari xizmatlari uchun to‘lovlarni amalga oshira oladi va har safar o‘z hisobiga keshbek oladi”, — deyiladi kompaniya xabarida.
Humans’ning mobil aloqa operatori va moliyaviy xizmatini ishga tushirish 2020-yil 18-avgustga rejalashtirilgan. Shu sanadan boshlab O‘zbekistondagi foydalanuvchilar bo‘lib to‘lash sharti bilan chiroyli telefon raqami sotib olishi, o‘ziga kerakli tarifni ulashi yoki butunlay bepul aloqadan foydalanishi mumkin bo‘ladi.
Ma’lum qilinishicha, mamlakat aholisi kompaniya sotuv ofisida ikki daqiqada bank kartasini olishi va komission to‘lovlarsiz pul o‘tkazishi mumkin bo‘ladi.
Kompaniya tomonidan ma’lum qilinishicha, Humans.uz nomli birinchi mobil dastur taqdim etildi. Dastur o‘zbekistonliklarga bonuslar to‘plash imkonini berish uchun mobil aloqa operatori va bank ishga tushishidan ikki oy avval taqdim etildi. Yig‘ilgan bonuslar yordamida Humans’ning xizmatlariga to‘lovni amalga oshirish mumkin.
Bonus dasturida ishtirok etish uchun mobil dasturni yuklab olish va unga Uzcard yoki Humo to‘lov tizimlaridagi bank kartasini ulash kerak.
“Humans” MChJ 2016-yilda asos solingan Humans kompaniyalar guruhi tarkibiga kiradi. Guruh moliya, telekommunikatsiyalar sohasida texnologik loyihalar ishlab chiqishga, tibbiyot sohasida ma’lumotlar almashishga ixtisoslashgan.
Izoh (0)