Халқаро компаниялар гуруҳи Humans Ўзбекистон бозорига кирмоқда. Бу ҳақда компания матбуот хизматига таяниб, Spot хабар берди.
Маълум қилинишича, 16 июнь куни Humans Ўзбекистонда ўз мобил дастурининг биринчи талқинини тақдим этди. Дастур ўзида молиявий хизматлар, мобил алоқа оператори ҳамда товарлар ва хизматлар пештахтасини бирлаштирган.
«Энди Ўзбекистон аҳолиси бутун мамлакат бўйлаб Humans’нинг ҳамкорлари хизматлари учун тўловларни амалга ошира олади ва ҳар сафар ўз ҳисобига кешбэк олади», — дейилади компания хабарида.
Humans’нинг мобил алоқа оператори ва молиявий хизматини ишга тушириш 2020 йил 18 августга режалаштирилган. Шу санадан бошлаб Ўзбекистондаги фойдаланувчилар бўлиб тўлаш шарти билан чиройли телефон рақами сотиб олиши, ўзига керакли тарифни улаши ёки бутунлай бепул алоқадан фойдаланиши мумкин бўлади.
Маълум қилинишича, мамлакат аҳолиси компания сотув офисида икки дақиқада банк картасини олиши ва комиссион тўловларсиз пул ўтказиши мумкин бўлади.
Компания томонидан маълум қилинишича, Humans.uz номли биринчи мобил дастур тақдим этилди. Дастур ўзбекистонликларга бонуслар тўплаш имконини бериш учун мобил алоқа оператори ва банк ишга тушишидан икки ой аввал тақдим этилди. Йиғилган бонуслар ёрдамида Humans’нинг хизматларига тўловни амалга ошириш мумкин.
Бонус дастурида иштирок этиш учун мобил дастурни юклаб олиш ва унга Uzcard ёки Humo тўлов тизимларидаги банк картасини улаш керак.
«Humans» МЧЖ 2016 йилда асос солинган Humans компаниялар гуруҳи таркибига киради. Гуруҳ молия, телекоммуникациялар соҳасида технологик лойиҳалар ишлаб чиқишга, тиббиёт соҳасида маълумотлар алмашишга ихтисослашган.
Изоҳ (0)