To‘ra Bobolov: “Muzrabotdagi to‘yda belgilangan karantin qoidalariga rioya qilinmagani oqibatida 250 nafardan ortiq fuqaro karantinga olindi”

Surxondaryo viloyati hokimi To‘ra Bobolov mahalliy televideniye orqali aholiga qilgan murojaatida to‘y va ma’rakalarning o‘tkazilishida belgilangan karantin qoidalariga rioya qilinmayotganini qayd etdi.

“To‘y va ma’rakalarning belgilangan talablar bo‘yicha o‘tkazilmaganligi natijasida ham ko‘plab fuqarolar karantinga olinmoqda. Xususan, Muzrabot tumanida o‘tkazilgan to‘yda belgilangan karantin qoidalariga amal qilinmaganligi natijasida 250 dan ortiq fuqaro karantinga olindi”, – degan Surxondaryo hokimi.

Bobolovning so‘zlariga ko‘ra, viloyatda 4118 nafar fuqaro karantinga olingan. Ularning 298 nafari tibbiyot muassasalarida, 678 nafari sihatgoh va maxsus binolarda, 3142 nafari esa o‘z uylarida kuzatuvda bo‘lib turibdi.

“Eng yomoni, bu kasallik aholi orasida aniqlanyapti. Ular kasallikni aynan qayerda yuqtirganligini, kasallik manbaini aniqlash qiyin bo‘lmoqda.

Karantin qoidalariga so‘zsiz amal qilgan holda harakat qilmasak, koronavirus infeksiyasini hech qachon yenga olmaymiz. Shuning uchun virus tarqalishining oldini olishda barchamiz birdek mas’uliyatimizni oshirib, bor kuchimizni safarbar etishimiz lozim”, – dedi To‘ra Bobolov.

Avval kasallik aniqlanganlarning barchasi Surxondaryo viloyatidan bo‘lib, ularning 1 nafari og‘ir, 4 nafari o‘rta og‘ir, qolganlari nisbatan qoniqarli ahvolda ekani hamda viloyatga kirib-chiqiladigan “Darband” yo‘l-patrul posti hamda Termiz shahri, Muzrabot, Termiz, Sho‘rchi, Boysun, Qumqo‘rg‘on va Jarqo‘rg‘on tumanlarida qat’iy karantin talablari joriy etilgani xabar qilingan. Surxondaryo viloyati 20-maydan buyon “yashil” hudud edi. Koronavirus viloyatga qaytgach, shahar va tumanlarning ranglari o‘zgardi. Termiz shahri, Boysun tumani, Muzrabot tumani, Termiz tumani, Sho‘rchi tumani “qizil” hududlar bo‘lib turibdi.