Qashqadaryodagi bog‘chalarga ichimlik suvi yetkazib beruvchi avtomobillar ajratiladi

Qashqadaryo viloyatidagi mavjud bolalar bog‘chalarining ichimlik suviga bo‘lgan ehtiyojini qondirish maqsadida maktabgacha ta’lim boshqarmasiga qarashli suv tashuvchi avtomobil faoliyati yo‘lga qo‘yiladi. Bu haqda viloyat maktabgacha ta’lim boshqarmasi boshlig‘i Asror Alimardonov ma’lum qildi, deya xabar berdi “Daryo” muxbiri.

Ma’lum bo‘lishicha, joriy yilning 16-iyun kuni Qarshi shahridagi Jurnalistlar uyida Qashqadaryo viloyat maktabgacha ta’lim boshqarmasi boshlig‘i Asror Alimardonov ishtirokida matbuot brifingi bo‘lib o‘tgan.

Brifingda so‘z olgan Asror Alimardonov viloyatdagi mavjud 1284 ta bog‘chalarda ichimlik suvi muammo bo‘layotgani, mazkur muammoni yechish maqsadida bog‘chalarga suv yetkazib beruvchi avtomobil ajratilishi ko‘zda tutilganini ta’kidlagan.

“Yoz oylarida viloyatdagi barcha bog‘chalarda ichimlik suvi muammo bo‘ladi. Suvga bo‘lgan ehtiyojning ortishi bois suv uchun ajratilgan mablag‘ yetmay qoladi. Mazkur muammoni yechish maqsadida ichimlik suvi uchun katta hajmli temir idishlar ajratilishi reja qilingan. Ammo o‘sha suv idishlarga suv olib kelish qimmatga tushayotgani sabab boshqarma tasarrufidagi bog‘chalarga suv yetkazib beruvchi avtomobil ajratilishini so‘rayapmiz. Agar shu reja amalga oshsa, bog‘chalarimizga o‘zimiz ichimlik suvi yetkazib beramiz”, — deydi Asror Alimardonov.

“Daryo” muxbirining aniqlashtirishicha, Qarshi shahri va tumanidagi bog‘chalar yoz oylarida haftada ikki marotaba suv sotib oladi. Besh tonna suv to‘kish imkoniyatiga ega avtomobillar 55-60 ming so‘m evaziga suv keltirib berishi hisobga olinsa, har haftada bir marotaba suv sotib olinsa ham bitta bog‘cha suv uchun oyiga 220-240 ming so‘m xarajat qiladi.

“Bog‘chamizga ichimlik suvi uchun pul ajratilishini eshitamiz, ammo o‘sha pulni ko‘rmaymiz, — deydi ismi va qaysi bog‘cha rahbari ekanligi sir qolishini so‘ragan mudira. — Suv uchun ajratilgan pulni bo‘lim boshliqlari naqdlashtirib, cho‘ntagiga uradi. Hujjatlarda esa bog‘chalarga pul ajratilgani yozib kelinadi”.

Aniqlanishicha, viloyatdagi 384 ta davlat bog‘chasi ichimlik suvini sotib oladi.