Namangan viloyatida bolalarning majburiy mehnatga jalb etish holatlari aniqlanmadi. Bu haqda Bandlik va mehnat munosabatlari vazirligi matbuot xizmati xabar berdi.
Idora ma’lumotlariga ko‘ra, 30-maydan 7-iyunga qadar Pop tumanida monitoring o‘tkazgan faollar o‘smirning paxta dalasida yurgani to‘g‘risida ma’lum qilgan. Mazkur ma’lumotni tekshirish maqsadida Namangan viloyati Davlat mehnat inspeksiyasi faollari va joylardagi mas’ullar bilan bog‘langan.
“Bolaning dalada paydo bo‘lish holati tafsilotlarini o‘rganish natijasida bola ‘Javlonbek-Janona-Jo‘rabek’, ‘Abdurauf Pop Chodak’, ‘Shohzamon Pungon’, ‘Saidislom Xojiakbar kelajak’, ‘Pop G‘olib Kamol’, ‘G‘ayrat Chodak Pop’ fermerlik xo‘jaliklarining yollanma ishchilari hisoblangan ota-onasi ortidan ergashganligi aniqlandi. U dalaga o‘z ixtiyori bilan kelgan, hozirgi karantin cheklovlari davrida o‘qishning yo‘qligi va bolani band qilishning boshqa choralari mavjud bo‘lmaganligi sababli ota-onasi uni o‘zlari bilan olib ketishga rozi bo‘lgan. Bolani mehnatga majburiy jalb qilish holati bo‘lmagan”, — deyiladi xabarda.
Ma’lumot uchun, “O‘n sakkiz yoshdan kichik shaxslarning mehnati qo‘llanishi taqiqlanadigan noqulay mehnat sharoitlari ishlari ro‘yxati”ni tasdiqlash to‘g‘risidagi qo‘shma qarorga muvofiq, qishloq xo‘jaligi sohasida paxtani qo‘lda sug‘orishda va paxtani qo‘lda terishda o‘n sakkiz yoshga to‘lmagan shaxslar mehnatidan foydalanish taqiqlangan bo‘lsa-da, ularning paxta chopig‘i ishlarida qatnashishi taqiqlanmagan.
Ta’kidlanishicha, Bandlik va mehnat munosabatlari vazirligi uch taraflama sheriklar bilan birgalikda yuzaga kelishi mumkin bo‘lgan xavf-xatarlarni o‘rganmoqda, bolalar mehnatiga yo‘l qo‘yilishini favqulodda holat deb qarab, O‘zbekistonda majburiy mehnatni bartaraf etish bo‘yicha islohotlarning joriy etilishini mustahkamlamoqda.
Shu bilan birga, barcha hududiy Davlat mehnat inspeksiyalari tomonidan mavsumiy ishchilarni qishloq xo‘jalik ishlariga jalb etishda, shu jumladan, mehnat shartnomalarini rasmiylashtirish, ish haqini o‘z vaqtida to‘lash, zarur sharoitlarni yaratish kabilarda barcha fermer xo‘jaliklari va klasterlarda seminarlar o‘tkazish yo‘li bilan tushuntirish hamda monitoring ishlarini olib borish bo‘yicha qo‘shimcha ishlar olib borilmoqda.
Shuningdek, ijtimoiy tarmoqlar orqali tarqalgan, faollarning inson huquqlarining va karantin talablarining buzilishi ehtimoli yuzasidan Bosh prokuratura tomonidan o‘rganish ishlari o‘tkazilmoqda.
Avvalroq O‘zbekiston Cotton Campaign’ni 2020-yilgi paxta terimi monitoringiga taklif qilgani to‘g‘risida xabar berilgandi.
Mavzuga doir:
Izoh (0)