O‘zbekistonda 16-iyun kuni koronavirus aniqlangan 230 nafar bemordan 20 nafari aholi orasida tasdiqlandi. Sog‘liqni saqlash vazirligi mazkur bemorlar haqida ma’lumot berdi.
Qayd etilishicha, 15-iyun sanasida mamlakatda koronavirus infeksiyasi tasdiqlangan 183 nafar bemorning 29 nafari aholi orasida aniqlangan bo‘lsa, 16-iyun kuni esa koronavirus qayd etilgan 230 nafar bemordan 20 nafari aholi orasida tasdiqlandi. Ikki kunlik ma’lumotga ko‘ra, umumiy kasallanish ko‘rsatkichi ancha oshgan, aholi orasida koronavirusga chalinish holati esa birmuncha kamaygan.
16-iyun kuni aholi orasida koronavirusga chalinish holatlari quyidagi hududlarda qayd etilgan:
- Toshkent shahrida 14 nafar;
- Buxoro viloyatida 3 nafar;
- Samarqand viloyatida 2 nafar;
- Namangan viloyatida 1 nafar.
Bundan tashqari, “Malika” savdo majmuasi sotuvchisi ishga chiqish uchun namuna topshirganda, unda virus borligi ma’lum bo‘lgan. Yunusobod tumanida yashovchi homilador ayol shifoxonaga yotish uchun namuna topshirgan, unda ham virus aniqlangan. Sergeli tumanida yashovchi vaqtincha ishsiz fuqaro ham virus yuqtirib olgani ma’lum bo‘lgan. Bu fuqaro tana harorati ko‘tarilgach, shifokorga murojaat qilmasdan uy sharoitida davolangan. Shuningdek, bu fuqaroning 4 nafar oila a’zosida ham koronavirus tasdiqlangan. Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazida davolanish uchun namuna topshirgan fuqaroda ham infeksiya aniqlangan.
Shuningdek, Samarqand tumanida yashovchi nafaqadagi fuqaro onkologiya kasalligi sababli shifoxonaga yotish uchun namuna topshirganda, unda virus aniqlangan. Samarqand shahridagi 24-maktab farroshi ko‘krak bezi kasalligi bo‘yicha namuna topshirganda, koronavirus yuqtirib olgani ma’lum bo‘lgan. Koronavirus Buxoro viloyati Shofirkon tumanida yashovchi haydovchida ham ham tasdiqlangan.
Eslatib o‘tamiz, O‘zbekistonda 16-iyun kuni 230 kishida koronavirus aniqlandi, ularning 104 nafari Qashqadaryo viloyatida karantinga olingan fuqarolar hisoblanadi. Mazkur ko‘rsatkich mamlakatda pandemiya boshlanganidan buyon qayd etilgan eng yuqori kunlik ko‘rsatkichlar qatorida ikkinchi o‘rinni egalladi. Eng yuqori ko‘rsatkich 7-iyun kuni qayd etilgan bo‘lib, o‘sha kuni 237 kishida kasallik tasdiqlangan.
Prezident Shavkat Mirziyoyev 16-iyun kuni bo‘lib o‘tgan videoselektorda aholi orasida kasallik holatlari ko‘payib borayotganini alohida ta’kidladi hamda Toshkent shahri, Toshkent, Navoiy va Qashqadaryo viloyatlarida vaziyat murakkab bo‘lib turganini aytdi.
Ma’lumot uchun, aholi orasida koronavirusga chalinish holatlari soni 15-iyun kuni 29 tani, 14-iyun kuni 27 tani, 13-iyun kuni 5 tani, 12-iyun kuni 26 tani tashkil qildi.
Izoh (0)