O‘zbekistonda yuridik shaxslarning yangi shakli paydo bo‘ladi

Qonun hujjatlari ta’sirini baholash tizimi portalida “Cheklangan sherikchilik to‘g‘risida”gi qonun loyihasi e’lon qilindi, deb xabar beradi Norma.

O‘zbekiston iqtisodiyotiga investitsiyalar jalb qilish uchun huquqiy asos yaratish va cheklangan sherikchilik shartnomasi asosida investitsion loyihalarni amalga oshirish qonun loyihasining maqsadi hisoblanadi.

Loyihada keltirilishicha, cheklangan sherikchilik shartnomasi asosida ikkita yoki bir nechta shaxs (sherik) yuridik shaxs tuzib, o‘z mablag‘larini birlashtirish va sherikchilikdagi investitsion faoliyatni amalga oshirish majburiyatini oladi.

Cheklangan sherikchilik shartnomasida sheriklar cheklangan sherikchilik shartnomasida (keyingi o‘rinlarda – Shartnoma) ko‘rsatilgan doirada va hajmda ishtirok etadi. Bunda bitta yoki bir nechta sherik (boshqaruv kompaniyasi) barcha sheriklar nomidan hamkorlarning umumiy ishini yuritadi.

Quyidagilar Shartnoma ishtirokchilari bo‘lishi mumkin:

• sheriklar – Shartnomani tuzgan hamda hamkorlarning umumiy mulkiga o‘z hissasini qo‘shgan yuridik va jismoniy shaxslar;
• boshqaruvchi kompaniya – tuzilgan shartnomaga muvofiq umumiy ishlarni yuritadigan va investitsiyani boshqaradigan tijorat tashkiloti;
• malakali investorlar – investitsion kompaniyalarga milliy valyutada va/yoki MBning investitsiya kiritilgan sanadagi kursi bo‘yicha xorijiy valyutada BHMning 2500 baravari miqdorida pul mablag‘lari ko‘rinishida investitsiya kiritgan yuridik va jismoniy, jumladan, xorijiy shaxslar;
• Cheklangan sherikchilik ishtirokchilari soni 50 dan oshmasligi kerak.

Cheklangan sherikchilikni ta’sis etish va uni ro‘yxatdan o‘tkazish uchun ustav va ta’sis shartnomasi talab etilmaydi. Mazkur holatda Shartnoma va umumiy ishlarni yuritish siyosati (investitsion deklaratsiya) ta’sis hujjatlari sanaladi.

Shartnomada “cheklangan sherikchilik” so‘zlarini o‘z ichiga olgan cheklangan sherikchilik nomi va uning Tadbirkorlik subyektlarini Yagona davlat reyestrida ro‘yxatga olishda olingan STIR raqami ko‘rsatiladi. Shartnoma bo‘yicha investitsion faoliyatni amalga oshirish natijasida cheklangan sherikchilik tomonidan olinadigan foyda ikki marta soliqqa tortilmaslik uchun Soliq kodeksiga muvofiq soliqqa tortilmaydi.

Loyiha to‘g‘risidagi batafsil ma’lumotlar bilan quyidagi havola orqali tanishish mumkin.