2020-yilning 16-iyun kuni Suv xo‘jaligi vazirligida “O‘zbekistonda suv resurslarini boshqarish milliy loyihasining 2-bosqichi to‘g‘risida” ikki tomonlama bitim imzolandi. Bu haqda Suv xo‘jaligi vazirligi matbuot xizmati xabar qilgan.
Hujjat O‘zbekiston Respublikasi hukumati nomidan Suv xo‘jaligi vaziri Shavkat Xamrayev va Shveysariya konfederatsiyasi hukumati nomidan Shveysariyaning O‘zbekistondagi favqulodda va muxtor elchisi Olive Shav tomonidan imzolangan.
Xabarda qayd etilishicha, “O‘zbekistonda suv resurslarini boshqarish milliy loyihasi”ning 1-bosqichi muvaffaqiyatli yakunlangan va 2-bosqich Shveysariya hamkorlik va taraqqiyot agentligining “Markaziy Osiyoda suv resurslarini boshqarish hududiy dasturi” doirasidagi faoliyatining mantiqiy davomi bo‘ladi. Unda O‘zbekistondagi suv resurslarini integrallashgan holda boshqarish orqali qishloq aholisining yashash sharoitlarini yaxshilashga hissa qo‘shish nazarda tutilgan.
Loyihaning umumiy budjeti 4,6 million Shveysariya frankiga teng va u 2020–2023-yillarda amalga oshiriladi.
Dasturga muvofiq, O‘zbekistondagi 13 ta irrigatsiya tizimlari havza boshqarmasi va 152 ta tuman irrigatsiya bo‘limlarida suvdan samarali foydalanish va suv resurslarini barqaror boshqarishni rejalashtirish uchun dasturiy ta’minot majmui ishlab chiqiladi, shuningdek, sug‘orish-drenaj tarmoqlarini AKT asosida monitoring qilish tizimini yaratish ham ko‘zda tutilgan.
Kelgusida qishloq xo‘jaligi va suv resurslarini boshqarishga ixtisoslashgan kasb-hunar kollejlari o‘quvchilari hamda fermerlarning suv tejovchi texnologiyalar haqidagi bilimlarini mustahkamlashga qaratilgan tadbirlar amalga oshiriladi, deyilgan vazirlik matbuot xizmati bergan xabarda.
Mavzuga doir:Suv xo‘jaligi sohasidagi loyihalarni amalga oshirish agentligiga yangi rahbar tayinlandi
Izoh (0)