Vazirlar Mahkamasining 16-iyundagi 385-sonli qarori bilan Odil Abdurahmonov Toshkent davlat transport universitetining rektori etib tayinlandi. Bu haqda Oliy va o‘rta maxsus ta’lim vazirligi ma’lum qildi.
Odil Abdurahmonov 1978-yilda tug‘ilgan. Bunga qadar Prezidentning fan, ta’lim, sog‘liqni saqlash va sport masalalari bo‘yicha maslahatchisi Abdujabbor Abduvohidovning o‘rinbosari sifatida ishlagan.
Shuningdek, u oliy va o‘rta maxsus ta’lim vazirining birinchi o‘rinbosari, Prezident administratsiyasida bosh maslahatchi (konsultant) bo‘lgan, Respublika bandlik, mehnat muhofazasi va aholini ijtimoiy himoya qilish ilmiy markaziga rahbarlik qilgan va iqtisodiyot fanlari doktori ilmiy darajasiga ega.
Avvalroq Prezident Administratsiyasi ta’lim sho‘basi mudiri Usmon Sharifxo‘jayev xalq ta’limi vazirining birinchi o‘rinbosari lavozimini egallagani haqida xabar berilgan edi.
Eslatib o‘tamiz, may oyida Toshkent temiryo‘l muhandislari instituti, Toshkent avtomobil yo‘llarini loyihalash, qurish va ekspluatatsiyasi instituti va Toshkent davlat texnika universitetining aviakosmik texnologiyalari fakulteti negizida Toshkent transport universiteti tashkil etilishi to‘g‘risida xabar berilgandi.
Izoh (0)