12-iyun kuni internetda Qirg‘izistonning Jalolobod viloyati Suzoq tumani Bekobod qishlog‘ida yashovchi ayol eri tomonidan xo‘rlangani tasvirlangan video tarqalib, keng jamoatchilik muhokamasiga sabab bo‘ldi. Videoda 50 yoshli erkak bo‘yniga avtomobil shinalari ilingan ayolini urib, uning ustidan chelakda suv quyayotgani tasvirlangan. “Kloop.kg”ning yozishicha, zo‘ravon er 15 sutkaga qamalgan.
Ma’lumotlarga ko‘ra, ayol singlisinikiga borib kelgani uchun eri tomonidan kaltaklangan. Ayolning kaltaklanishi tasvirlangan video tarqalganidan so‘ng, uning o‘g‘li yordamga yetib kelgan. Oila yaqinlarining ta’kidlashicha, ayolning turmush o‘rtog‘i tomonidan kaltaklanishi birinchi marotaba sodir bo‘lmayapti.
Videoda erkak bu dars bo‘lishi uchun shu ishni qilayotganini ta’kidlagan. Shundan so‘ng, u videoni xotinining singlisiga yuborgan.
“U ataylab hammasini videoga olib, menga yubordi. Bu barcha uchun dars bo‘lishi kerak ekan. Ma’lum bo‘lishicha, u bunga qadar ham xotinini kaltaklab kelgan”, — deydi singil.
Avvaliga militsiya ushbu holatni “Oiladagi zo‘ravonlik” moddasi bo‘yicha qayd etish niyatida bo‘lgan, biroq faktlar o‘rganilgach, “Qiynoqqa solish” moddasiga o‘zgartirilgan.
13-iyun kuni Suzoq tuman sudi qarori bilan erkak 15 sutkaga qamalgan.
Izoh (0)