Қирғизистонда хотинини синглисиникига боргани учун қийноққа солган эркак 15 суткага қамалди (видео)

12 июнь куни интернетда Қирғизистоннинг Жалолобод вилояти Сузоқ тумани Бекобод қишлоғида яшовчи аёл эри томонидан хўрлангани тасвирланган видео тарқалиб, кенг жамоатчилик муҳокамасига сабаб бўлди. Видеода 50 ёшли эркак бўйнига автомобиль шиналари илинган аёлини уриб, унинг устидан челакда сув қуяётгани тасвирланган. «Kloop.kg»нинг ёзишича, зўравон эр 15 суткага қамалган.

Маълумотларга кўра, аёл синглисиникига бориб келгани учун эри томонидан калтакланган. Аёлнинг калтакланиши тасвирланган видео тарқалганидан сўнг, унинг ўғли ёрдамга етиб келган. Оила яқинларининг таъкидлашича, аёлнинг турмуш ўртоғи томонидан калтакланиши биринчи маротаба содир бўлмаяпти.

Видеода эркак бу дарс бўлиши учун шу ишни қилаётганини таъкидлаган. Шундан сўнг, у видеони хотинининг синглисига юборган.

«У атайлаб ҳаммасини видеога олиб, менга юборди. Бу барча учун дарс бўлиши керак экан. Маълум бўлишича, у бунга қадар ҳам хотинини калтаклаб келган», — дейди сингил.

Аввалига милиция ушбу ҳолатни «Оиладаги зўравонлик» моддаси бўйича қайд этиш ниятида бўлган, бироқ фактлар ўрганилгач, «Қийноққа солиш» моддасига ўзгартирилган.

13 июнь куни Сузоқ туман суди қарори билан эркак 15 суткага қамалган.