Respublika maxsus komissiyasi qaroriga ko‘ra, joriy yilning 8-iyunidan “sariq” va “yashil” hududlarda avtobuslar harakatiga ruxsat berildi. Shunga ko‘ra, Qashqadaryo viloyatida ham avtobuslar faoliyati qayta tiklandi. “Daryo” muxbiri avtobus yo‘lovchisi sifatida jarayonni kuzatdi.
Ma’lum bo‘lishicha, Qarshi shahridagi Islom Karimov (xalq tilida birinchi yo‘nalish nomini olgan) markaziy ko‘chada 8-iyun kuni 15 ta avtobus aholiga xizmat ko‘rsatishni boshlagan. Ayni kunga kelib esa avtobuslar 20-25 taga yetgan.
Temiryo‘l vokzalidan Yerqo‘rg‘on bozorigacha bo‘lgan 10-12 kilometr masofani bosib o‘tgani evaziga 1000 so‘m xizmat haqi olayotgan haydovchilar yo‘lovchilar soni me’yordan oshishiga unchalik ham e’tibor qaratmayapti. 6 va 12-yo‘nalishda faoliyat ko‘rsatayotgan avtobuslarda ham shunday holat mavjud.
Shahar chekkasi va yaqin tumanlardan shahar markaziga qarab harakatlanayotgan avtobuschilar esa karantin qoidalari va yo‘lovchilar o‘rtasida masofa saqlash degan so‘zlarga umuman e’tibor qaratmagan ko‘rinadi. Birgina Qarshi tumanining Xonabod massividan Qarshi shahri markazi, xususan, Eski bozor va Yangi bozor hududlari tomon harakatlanayotgan avtobuslarda yo‘lovchilar sig‘imi ortib ketishi yaqqol ko‘zga tashlanmoqda.
Qashqadaryo viloyat transport boshqarmasi axborot xizmati rahbari Mirzohid Jo‘rayevning ma’lumot berishicha, ayni kunda Qarshi shahrida 1, 2, 4, 6, 10, 12, 17,18, 30, 460-yo‘nalishlarda 137 ta avtobus harakatlanayotgan bo‘lsa, tumanlarga qatnayotgan avtobuslar soni 100 taga yetgan.
Koronavirus xavfi sabab yopilgan Kitob va “qizil” hudud maqomini olgan Chiroqchi tumanlaridan tashqari viloyatning barcha tumanlariga jamoat transporti qatnovi yo‘lga qo‘yilgan.
“Shaharlararo avtobuslar qatnovi ham lozim darajada amalga oshirilayapti. Ayni paytda Qarshi—Qamashi, Qarshi—Nishon yo‘nalishlariga avtobuslarda yo‘lovchi tashilmoqda, — deydi Mirzohid Jo‘rayev. — Albatta, jamoat transporti faoliyatini qayta tiklashda ayrim talablarga qat’iy rioya qilinishiga e’tibor qaratilayapti. Avtokorxona tomonidan transport vositasi har bir qatnov oldidan va oxirgi bekatda, shuningdek, avtoshohbekatlarda muntazam to‘liq dezinfeksiya qilinmoqda. Haydovchilar tibbiy niqob va qo‘lqoplar bilan ta’minlangan. Avtobus saloniga faqatgina tibbiy niqobdagi yo‘lovchilarni kiritish ruxsat etiladi.
Qarshi shahridagi birinchi yo‘nalish nomini olgan markaziy ko‘chadagi avtobuslar faoliyatini nazoratga oluvchi “Sharofiddin Nurilla” MChJ uyushmasi mas’uli Sanjar Bahromovning so‘ziga ko‘ra, mazkur yo‘nalishdagi avtobuslar Temiryo‘l vokzali va Yerqo‘rg‘on bozorida dezinfeksiya qilinadi.
Qashqadaryo transport boshqarmasi mas’ullari ham “xodimlarimiz avtobuslar faoliyatini nazorat qilmoqda, karantin qoidalariga amal qilinishi doimiy e’tiborimizda” deyishsa-da, Yerqo‘rg‘on bozorida avtobuslarni dezinfeksiya qiluvchi tibbiyot xodimlariga ko‘zimiz tushmadi. Yerqo‘rg‘on bozoridan shahar markaziga qarab harakatlanayotgan avtobusga chiqqanimizda ham dezinfeksiya qilinganini sezmadik.
Birinchi yo‘nalishdagi avtobuslar harakatini tartibga oluvchi uyushma mas’ulining so‘ziga ko‘ra, mazkur yo‘nalishdagi avtobuslar soni tez orada 35-40 taga yetadi.
Kuzatuvlarimizga ko‘ra, shahar markazidagi avtobuslar harakati o‘rtasidagi vaqt uch daqiqani tashkil qiladi.
“ ‘Yashil’ hududlarda avtobuslar qatnovi yo‘lga qo‘yilishi yo‘lovchilarga qulaylik yaratayapti, yo‘lkira narxlari asossiz oshib ketmasligi ta’minlanyapti”, — deydi viloyat transport boshqarmasi axborot xizmati mas’ullari.
“Avtobuslar qatnay boshlagani yaxshi bo‘ldi. Boisi, shahar ichidagi sariq taksilarga bir chiqib tushish 3 000 so‘m etib belgilangan. Avtobuslar esa beminnat 1000 so‘mdan qatnayapti”, — deydi “Daryo” muxbiri bilan suhbatlashgan yo‘lovchilardan biri.
Eslatib o‘tamiz, 2020-yil mart oyi oxirida mamlakatning barcha hududlarida bo‘lgani kabi Qashqadaryo viloyatida ham jamoat transporti harakati to‘xtatilgan edi. O‘sha payt Damas va mikroavtobuslar faoliyatiga qo‘yilgan taqiq hozirgacha bekor qilinmagan.
Izoh (0)