“Andijon iqtisodiyot va qurilish institutini tashkil etish to‘g‘risida” Vazirlar Mahkamasining qaror loyihasi e’lon qilindi.
Unga ko‘ra, Oliy va o‘rta maxsus ta’lim vazirligi, Qurilish vazirligi hamda Andijon viloyati hokimligining Andijon viloyati Andijon shahrida Andijon iqtisodiyot va qurilish institutini tashkil etish to‘g‘risidagi taklifiga rozilik beriladi.
Institut faoliyatining asosiy yo‘nalishlaridan biri iqtisodiyot va qurilish sohasi bo‘yicha amaliy ko‘nikmalarga ega, raqobatbardosh oliy ma’lumotli mutaxassislar va ilmiy-pedagogik kadrlarni, shuningdek, ommaviy kasb mutaxassislarini tayyorlash, qayta tayyorlash va ularning malakasini oshirish hisoblanadi.
Belgilanishicha, institut yuridik shaxs maqomiga ega bo‘lgan davlat oliy ta’lim muassasasi hisoblanadi va Oliy va o‘rta maxsus ta’lim vazirligi tizimida faoliyat yuritadi.
Ta’lim faoliyati 2020/2021-o‘quv yilidan boshlanadi.
Institutga talabalarni qabul qilish har yili tasdiqlanadigan respublika oliy ta’lim muassasalariga o‘qishga qabul qilish parametrlaridan kelib chiqqan holda davlat buyurtmasi va to‘lov-kontrakt asosida belgilanadi.
Andijon viloyati, Andijon shahri, Navoiy shoh ko‘chasi, 15-a uyda joylashgan O‘zbekiston Milliy universiteti huzuridagi texnikum (sobiq Andijon maishiy xizmat kasb-hunar kolleji) bino va inshootlarini (mavjud jihoz va mebellari bilan) tegishli hududi bilan birgalikda institutga operativ boshqaruv huquqi asosida berilishi kutilmoqda.
Avvalroq Andijon qishloq xo‘jaligi va agrotexnologiyalar institutini tashkil etish haqidagi qaror loyihasi muhokamaga qo‘yilgani, O‘zbekistonda Geologiya fanlari universiteti tashkil qilingani xabar berilgan edi.
Izoh (0)