Qashqadaryo viloyati Qarshi shahridagi “Yerqo‘rg‘on” dehqon bozorida koronavirusga chalingan bemor aniqlangani haqida xabarlar tarqalgandi. Bozor ma’muriyati esa buni rad etdi. Bu haqda bozor rasmiy kanalida ma’lum qilindi.
“‘Yerqo‘rg‘on’ dehqon bozori ishchilari orasida koronavirus infeksiyasi yuqtirgan kishi aniqlangani haqidagi mish-mishlar hech qanday asosga ega emas”, — deydi bozor axborot xizmati xodimi Sobir Narziyev.
Sobir Narziyevning ma’lumot berishicha, aholi orasida bunday gap tarqalishiga Koson tumani Neko‘z qishlog‘ida yashovchi uch nafar sotuvchining bozordan olib ketilib, koronavirusga tahlil olingani sabab bo‘lgan.
“Dastlabki tahlil natijalariga ko‘ra, ushbu sotuvchilarning hech birida virus aniqlanmadi”, — deydi Sobir Narziyev.
Ta’kidlanishicha, sotuvchilar tahlilga olib ketilganidan so‘ng bozorda barcha zarur xavfsizlik choralarini ko‘rish, sanitariya-gigiyena talablarini ta’minlash maqsadida dezinfeksiyalash tadbirlari boshlangan.
“Yerqo‘rg‘on dehqon bozori” AJ raisi Toshturdi To‘rayevning ma’lum qilishicha, 12-iyun kuni ham bozorda to‘liq dezinfeksiyalash tadbirlari o‘tkaziladi. 13-iyun kuni tongdan boshlab bozor karantin talablariga qat’iy amal qilingan holda yana o‘z faoliyatini boshlaydi.
“Daryo” muxbiri bilan suhbatlashgan viloyat sog‘liqni saqlash boshqarmasi axborot xizmati rahbari Nuriddin Egamov esa bozor sotuvchilarining tahlil natijalaridan bexabarligini aytdi.
Eslatib o‘tamiz, O‘zbekistonda 11-iyun soat 10:00 holatiga ko‘ra, yana 72 kishida koronavirus aniqlandi. Ularning 28 nafari Qashqadaryo viloyatidagi xorijiy korxona ishchilari ekanligi ma’lum qilindi.
Izoh (0)