Республика махсус комиссияси қарорига кўра, жорий йилнинг 8 июнидан «сариқ» ва «яшил» ҳудудларда автобуслар ҳаракатига рухсат берилди. Шунга кўра, Қашқадарё вилоятида ҳам автобуслар фаолияти қайта тикланди. «Дарё» мухбири автобус йўловчиси сифатида жараённи кузатди.
Маълум бўлишича, Қарши шаҳридаги Ислом Каримов (халқ тилида биринчи йўналиш номини олган) марказий кўчада 8 июнь куни 15 та автобус аҳолига хизмат кўрсатишни бошлаган. Айни кунга келиб эса автобуслар 20-25 тага етган.
Темир йўл вокзалидан Ерқўрғон бозоригача бўлган 10-12 километр масофани босиб ўтгани эвазига 1000 сўм хизмат ҳақи олаётган ҳайдовчилар йўловчилар сони меъёрдан ошишига унчалик ҳам эътибор қаратмаяпти. 6 ва 12-йўналишда фаолият кўрсатаётган автобусларда ҳам шундай ҳолат мавжуд.
Шаҳар чеккаси ва яқин туманлардан шаҳар марказига қараб ҳаракатланаётган автобусчилар эса карантин қоидалари ва йўловчилар ўртасида масофа сақлаш деган сўзларга умуман эътибор қаратмаган кўринади. Биргина Қарши туманининг Хонабод массивидан Қарши шаҳри маркази, хусусан, Эски бозор ва Янги бозор ҳудудлари томон ҳаракатланаётган автобусларда йўловчилар сиғими ортиб кетиши яққол кўзга ташланмоқда.
Қашқадарё вилоят транспорт бошқармаси ахборот хизмати раҳбари Мирзоҳид Жўраевнинг маълумот беришича, айни кунда Қарши шаҳрида 1, 2, 4, 6, 10, 12, 17,18, 30, 460-йўналишларда 137 та автобус ҳаракатланаётган бўлса, туманларга қатнаётган автобуслар сони 100 тага етган.
Коронавирус хавфи сабаб ёпилган Китоб ва «қизил» ҳудуд мақомини олган Чироқчи туманларидан ташқари вилоятнинг барча туманларига жамоат транспорти қатнови йўлга қўйилган.
«Шаҳарлараро автобуслар қатнови ҳам лозим даражада амалга оширилмоқда. Айни пайтда Қарши—Қамаши, Қарши—Нишон йўналишларига автобусларда йўловчи ташилмоқда, — дейди Мирзоҳид Жўраев. — Албатта, жамоат транспорти фаолиятини қайта тиклашда айрим талабларга қатъий риоя қилинишига эътибор қаратилаяпти. Автокорхона томонидан транспорт воситаси ҳар бир қатнов олдидан ва охирги бекатда, шунингдек, автошоҳбекатларда мунтазам тўлиқ дезинфекция қилинмоқда. Ҳайдовчилар тиббий ниқоб ва қўлқоплар билан таъминланган. Автобус салонига фақатгина тиббий ниқобдаги йўловчиларни киритиш рухсат этилади.
Қарши шаҳридаги биринчи йўналиш номини олган марказий кўчадаги автобуслар фаолиятини назоратга олувчи «Шарофиддин Нурилла» МЧЖ уюшмаси масъули Санжар Баҳромовнинг сўзига кўра, мазкур йўналишдаги автобуслар Темир йўл вокзали ва Ерқўрғон бозорида дезинфекция қилинади.
Қашқадарё транспорт бошқармаси масъуллари ҳам «ходимларимиз автобуслар фаолиятини назорат қилмоқда, карантин қоидаларига амал қилиниши доимий эътиборимизда» дейишса-да, Ерқўрғон бозорида автобусларни дезинфекция қилувчи тиббиёт ходимларига кўзимиз тушмади. Ерқўрғон бозоридан шаҳар марказига қараб ҳаракатланаётган автобусга чиққанимизда ҳам дезинфекция қилинганини сезмадик.
Биринчи йўналишдаги автобуслар ҳаракатини тартибга олувчи уюшма масъулининг сўзига кўра, мазкур йўналишдаги автобуслар сони тез орада 35-40 тага етади.
Кузатувларимизга кўра, шаҳар марказидаги автобуслар ҳаракати ўртасидаги вақт уч дақиқани ташкил қилади.
« ‘Яшил’ ҳудудларда автобуслар қатнови йўлга қўйилиши йўловчиларга қулайлик яратаяпти, йўлкира нархлари асоссиз ошиб кетмаслиги таъминланяпти», — дейди вилоят транспорт бошқармаси ахборот хизмати масъуллари.
«Автобуслар қатнай бошлагани яхши бўлди. Боиси, шаҳар ичидаги сариқ таксиларга бир чиқиб тушиш 3 000 сўм этиб белгиланган. Автобуслар эса беминнат 1000 сўмдан қатнаяпти», — дейди «Дарё» мухбири билан суҳбатлашган йўловчилардан бири.
Эслатиб ўтамиз, 2020 йил март ойи охирида мамлакатнинг барча ҳудудларида бўлгани каби Қашқадарё вилоятида ҳам жамоат транспорти ҳаракати тўхтатилган эди. Ўша пайт Damas ва микроавтобуслар фаолиятига қўйилган тақиқ ҳозиргача бекор қилинмаган.
Изоҳ (0)