Buxoro viloyatining sobiq hokimi, 1996—2011-yillarda viloyatga rahbarlik qilgan Samoydin Husenov viloyat Nuroniylar kengashi raisi lavozimiga tasdiqlandi. Bu haqda “Daryo”ga kengash matbuot kotibi Zuhra Qurbonova ma’lum qildi.
Ta’kidlanishicha, 10-iyun kuni Mahalla va oilani qo‘llab-quvvatlash vazirligi Buxoro viloyat boshqarmasi boshlig‘i Yo‘ldosh Jumayev raisligida nuroniylar jamoatchilik kengashining birinchi tashkiliy yig‘ilishi o‘tkazilgan. Unda boshqarmaning 2020-yil 29-maydagi qarori bilan 15 nafar a’zodan iborat viloyat nuroniylar jamoatchilik kengashi tarkibi shakllantirilib, tasdiqlangan.
“Nuroniylar jamoatchilik kengashi to‘g‘risidagi nizomga ko‘ra, boshqarma boshlig‘ining keksalar va faxriylar bo‘yicha o‘rinbosari bir vaqtning o‘zida viloyat Nuroniylar kengashiga ham raislik qilishi belgilangan. Shunga ko‘ra, ko‘p yillik ish tajribasiga ega, keng jamoatchilik o‘rtasida o‘z o‘rni va hurmatiga ega bo‘lgan Samoydin Husenov Nuroniylar kengashi raisi lavozimiga tasdiqlandi”, — dedi Yo‘ldosh Jumayev.
Qayd etilishicha, Buxoroning sobiq hokimi Samoydin Husenov 2011-yil Birinchi Prezident Islom Karimov qarori bilan lavozimidan ozod qilingan. 2017-yilda esa O‘zbekiston faxriylarini ijtimoiy qo‘llab-quvvatlash “Nuroniy” jamg‘armasining Buxoro viloyati kengashi raisi etib saylangan.
Izoh (0)