Foto: Yashil-oq avtobuslar Toshkent ko‘chalariga qaytdi

Avval xabar berilganidek, Respublika maxsus komissiyasi qaroriga ko‘ra, O‘zbekistonda 8-iyundan boshlab “sariq” va “yashil” hududlarda jamoat transportida shahar (tuman) va shahar atrofi yo‘nalishlari bo‘yicha avtobus harakatlariga ruxsat berilgan. “Toshshahartransxizmat” AJ tomonidan avtobus haydovchilari uchun kunlik rejalar bekor qilingan.

Ayni vaqtga kelib “Toshshahartransxizmat” AJ tarkibiga kiruvchi 16 ta avtokorxona (8 ta avtobus saroyi va 8 ta xususiy tashuvchi)ga jami 152 ta avtobus yo‘nalishlari (shundan 135 tasi avtobus saroylariga va 17 tasi xususiy korxonalarga tegishli) biriktirilgan bo‘lib, ushbu yo‘nalishlarga reja bo‘yicha jami 1230 ta avtobus (shundan 1121 ta avtobus saroylari bo‘yicha va 109 ta xususiy korxonalar bo‘yicha) ishga chiqarilgan.

Faoliyati qayta tiklanadigan yo‘nalishlarning harakati Maxsus komissiya qaroriga ko‘ra soat 6:00 dan 22:00 gacha tashkil qilingan.

Barcha avtobus saroylari rahbarlari tomonidan yo‘nalishlarning so‘nggi bekatlarida ikki smenalik navbatchilik belgilangan.

Yo‘nalishlarning so‘nggi bekatlarida avtobuslarni doimiy ravishda har bir qatnovga jo‘nashidan oldin to‘liq dezinfeksiya qilinadi. Haydovchilar tibbiy niqob va qo‘lqoplar bilan ta’minlanib, ushbu vositalar muntazam ravishda o‘z vaqtida almashtirib boriladi. Avtobuslar saloniga faqatgina tibbiy niqobdagi yo‘lovchilar kiritilmoqda.

“Daryo” muxbiri poytaxtning ayrim ko‘chalarida bo‘lib faoliyati qayta yo‘lga qo‘yilgan jamoat transporti harakatini kadrlarga muhrladi.

Eslatib o‘tamiz, koronavirus pandemiyasi tufayli 22-martdan buyon Toshkent shahrida jamoat transporti harakati to‘xtatilgan edi. 4-iyunda e’lon qilingan Respublika maxsus komissiyasining qarorida 15-iyundan hududlararo avtobus qatnovlariga ham ruxsat berilishi, biroq shahar jamoat transporti harakatiga cheklov saqlanib qolishi qayd etilgandi. 8-iyundan harakatiga ruxsat etilgan jamoat transportlarida sal avvalroq “Toshshahartransxizmat” dastlabki kunlarda ayrim yo‘nalishlarda karantin qoidalarining qo‘pol ravishda buzilishi holatlari kuzatilayotganini ma’lum qilgan.