So‘nggi uch kun davomida, jumladan, 8-iyun kuni kasallik qayd etilgan jami 109 nafar bemorning 66 nafari, 9-iyun kuni koronavirus aniqlangan jami 80 nafar bemorning 25 nafari hamda 10-iyun kuni sanasida mamlakatda koronavirus infeksiyasi tasdiqlangan 103 nafar bemorning 27 nafari aholi orasida aniqlandi. Bu haqda 11-iyun kuni Sog‘liqni saqlash vazirligi ma’lum qildi.

Qayd etilishicha, 10-iyundagi holatga ko‘ra, koronavirusga chalingan bemorlarning 11 nafari Toshkent viloyatidan, 7 nafari Toshkent shahridan, 3 nafari Sirdaryo viloyatidan, Samarqand va Buxoro viloyatlaridan 2 nafardan, 1 nafari esa Qashqadaryo viloyatidan.

Xususan, Toshkent shahrida tana harorati ko‘tarilib, uy sharoitida davolangan fuqaroda, Yunusobod tuman davlat soliq inspeksiyasining 2 nafar inspektorida, Shayxontohur tumanidagi Mediapark savdo majmuasi sotuvchisining onasida koronavirus aniqlangan.

Bundan tashqari, Toshkent viloyatida yashovchi, Yunusobod bozorida ziravorlar savdosi bilan shug‘ullanadigan fuqaroning 2 nafar oila a’zosida, Bekobod va Toshkent tumanlarida yashovchi 2 nafar fuqaro hamda Toshkent tumanidagi “Amerikan gospital” xususiy klinikasi kichik tibbiyot xodimida ham kasallik tasdiqlangan.

Shuningdek, koronavirus infeksiyasi aniqlangan Sirdaryo viloyati Ichki ishlar xodimining qo‘shnisi va u bilan muloqotda bo‘lgan 2 nafar tikuvchilik sexi xodimlarida, Samarqand viloyati “Maroqand” DUKning 2 nafar xodimi ham koronavirusga chalingani ma’lum bo‘ldi.

Bugun ayni paytga qadar kasalligi aniqlangan 72 nafar bemorning 20 nafari karantin markazidagi fuqarolar orasida aniqlangan bo‘lsa, qolgan 52 nafari aholi orasida qayd etilmoqda. Jumladan, Qashqadaryo viloyati Muborak tumanida faoliyat ko‘rsatuvchi xorijiy korxonaning bir yo‘la 28 nafar xodimida, Toshkent shahri Yunusobod bozorining yana 2 nafar sotuvchisida koronavirus infeksiyasi tasdiqlandi.

“Guvohi bo‘lganingizdek, koronavirus infeksiyasi mamlakatning istalgan hududida paydo bo‘lishi, jinsi va millatidan qat’i nazar har qanday kasbdagi fuqaroda qayd etilishi mumkin. Bizning hududda kasallik ko‘rsatkichi past yoki aniqlanmadi, deya bir zum bo‘lsa-da, xushyorlikni yo‘qotsangiz, kutilmaganda koronavirusni yuqtirib olishingiz va yaqinlaringiz sog‘ligini xavf ostida qoldirishingiz hech gap emas. Har birimiz ko‘chaga chiqish, muloqotga kirishish orqali kasallanish ehtimoli borligini unutmaslik kerak.

Shuning uchun zaruratsiz ko‘chaga chiqmang, odamlar ko‘p to‘planadigan jamoat joyiga borishdan vaqtinchalik tiyiling, ijtimoiy masofa saqlang, qo‘llarni yaxshilab qayta-qayta yuving, ko‘chaga chiqqanda niqob taqishni aslo unutmang, va umuman, karantin va sanitariya qoidalariga so‘zsiz rioya eting. O‘zingizda kasallik belgilarini sezsangiz zudlik bilan shifokorga murojaat eting”, — deyiladi vazirlik xabarida.

Ma’lumot uchun,  O‘zbekistonda 11-iyun soat 10:00 holatiga ko‘ra koronavirusga chalinganlar soni 4695 nafarni tashkil qilmoqda. Shu kungacha 3532 nafar bemor sog‘aygan, bemorlarning 19 nafari kasallik asoratlari oqibatida vafot etgan.