O‘zbekiston Prezidentining qaroriga ko‘ra, axborot texnologiyalari va kommunikatsiyalarini rivojlantirish vaziriga 2 nafar yangi o‘rinbosar tayinlandi. Bu haqda “Gazeta.uz” hukumatdagi manbasiga tayanib, xabar berdi.
Prezident qaroriga ko‘ra, Oleg Pekos ATKR vazirining raqamli iqtisodiyot va elektron hukumat masalalari bo‘yicha birinchi o‘rinbosari lavozimiga, Jamol Maxsudov vazirning telekommunikatsiya infratuzilmasi masalalari bo‘yicha o‘rinbosari lavozimiga tayinlangan.
Shuningdek, Axborot texnologiyalari va kommunikatsiyalarini rivojlantirish vazirligi markazi apparatining yangi tuzilmasi tasdiqlangani munosabati bilan, 3 nafar amaldagi vazir o‘rinbosarining vakolat doiralariga aniqlik kiritilgan.
Bunda, Jamshid Egamberdiyev ATKR vazirining investitsiyalar va moliya masalalari bo‘yicha o‘rinbosari, Bahromjon Olmatov vazirning axborot xavfsizligi va rejim masalalari bo‘yicha o‘rinbosari va Qahramon Yuldashev vazirning agrar sohasini raqamlashtirish masalalari bo‘yicha o‘rinbosari lavozimlariga tayinlandi.
Avvalroq ATKR vazirining birinchi o‘rinbosari Olimjon Umarov bosh vazir maslahatchisi — IT-texnologiyalar, telekommunikatsiya va innovatsion faoliyatni rivojlantirish departamenti rahbari etib tayinlanganligi to‘g‘risida xabar berilgandi. Umarov ushbu lavozimni 2017-yilning iyun oyidan beri egallab kelayotgan edi.
Izoh (0)