AQSh Grenlandiya poytaxti Nuuk shahrida konsullik ochdi. Bu haqda AQSh davlat kotibi Maykl Pompeo ma’lum qildi.
Maykl Pompeo bu yerda amerikaliklarning bo‘lishi Arktika mintaqasining gullab-yashnashiga hissa qo‘shishiga umid bildirdi.
AQSh konsulligi Grenlandiyada birinchi marta 1940-yilda Daniya fashistlar tomonidan bosib olingan paytda ochilgan va 1953-yilda yopilgan. Amerika uning faoliyatini qayta tiklamoqchi ekanligi 2019-yil oxirida ma’lum bo‘lgan.
2019-yilning avgust oyida The Wall Street Journal gazetasi Donald Tramp o‘z maslahatchilari bilan Daniya avtonom hududi bo‘lgan dunyodagi eng katta orol — Grenlandiyani sotib olish g‘oyasini bir necha bor muhokama qilganini xabar qilgandi. Tramp Grenlandiya orolini AQShning Arktikadagi o‘rnini kuchaytirish maqsadida sotib olmoqchi edi. Daniya qirollik oilasi Trampning Grenlandiyani sotib olish taklifini maqtov deb qabul qilgan.
Tramp bu ma’lumotni tasdiqlab, Twitter’dagi sahifasida hazilomuz rasm joylab Grenlandiyada Trump Tower osmono‘par binolarini qurmaslikka va’da bergan.
The Washington Post’ning yozishicha, Tramp administratsiyasi Daniyaga Grenlandiyaga cheksiz egalik qilish uchun yiliga 600 million dollar taklif qilmoqchi bo‘lgan.
Daniya va Grenlandiya vakillari orol sotilmasligini, uning taqdirini faqat aholining o‘zi hal qilishi mumkinligini bildirgan. Tramp Grenlandiyani sotishni muhokama qilishdan bosh tortgani sababli Daniya bosh vaziri bilan uchrashuvini bekor qilgan.
Izoh (0)